Қызыл кітапқа енген ақбөкенге қазір ешқандай қауіп жоқ.
Демек, оны қызыл кітаптан шығаратын кез келді. Бүгін бұл мәселеге арналған Мәжілістегі комитет отырысында осындай ұсыныс айтылды. Депутат Айдарбек Қожаназаровтың айтуынша, киікті атуға заң жүзінде тыйым салынғаны жануардың популяциясын реттеуге кедергі келтіріп тұр. Бүгінде қазақ даласындағы киік саны 5 миллионнан асты. Яғни әлемдегі ақбөкеннің 98 пайызы Қазақстанда жайылып жүр. Киелі киік санын көбейту практикасы жаһанға үлгі болғанмен, Ақмола, Қарағанды және Батыс өңірлерінің шаруаларына кесірін тигізіп жатыр. Мал жайылымына түскені өз алдына, егінді таптап кету қаупі бар. Оған қоса, мал арасында пастерелёз сияқты түрлі вирустың таралу қаупі бар. Әзірге экология және табиғи ресурстар министрлігінің жер-жерде құрған штабы киіктерді егістіктен әрі айдау ісімен айналысып жатыр. Бұған дейін мемлекет басшысы ұлттық құрылтайда үкіметке сала мамандары мен ғалымдардың зерттеуіне негізделген шешім қабылдауды тапсырған еді.
Айдарбек Қожаназаров, ҚР Парламенті Мәжілісінің депутаты:
- Қызыл кітапқа кіру критерийлері бар, шығу критерийлері бар. Енді қазір қарасақ, қазір біздің ақбөкеніміз Қызыл кітаптан шығатын да бүкіл критерийлерге сай болып тұр. Екіншіден, олардың жайылатын жерлерінің де азаю қаупі туындап тұрған жоқ.
