Оңтүстік Кореяда кейінгі екі жылда баспана құны шамамен 30 пайызға өсті.
Үкіметтің бағаны төмендету үшін қолға алған шаралары әзірге нәтижесіз. Бұл елде тұрғындардың жартысына жуығы пәтер жалдап отыр.
Владислав Цой, тілші:
-Оңтүстік Кореядағы ең қымбат тұрғын үйлер Сеулде орналасқан. Кореяның тұрғын үй мен қалалық кепілдік корпорациясының дерегінше, бұл шаһарда бір шаршы метрдің орташа бағасы 8 миллион 391 мың вонға немесе 5 мың 800 АҚШ долларынан асады. Бұл 2023 жылдың қаңтарымен салыстырғанда шамамен 30 пайызға көп.
Жылжымайтын мүлік бағасын төмендету мақсатында биыл маусым айында ел үкіметі несие алудың ең жоғары шегін 600 миллион вонмен немесе шамамен 420 мың АҚШ доллармен шектеді. Қазір бұл соманы тағы 140 мың долларға азайту мәселесі қарастырылып жатыр. Бұдан бөлек, сарапшылардың пікірінше, тұрғын үй бағасын ұстап тұру үшін билік салық мөлшерін арттыруға да баруы мүмкін. Соңғы мәліметтер бойынша, Оңтүстік Кореяда шамамен 22 миллион үй шаруашылығы бар. Олардың 9 миллион 618 мыңы немесе 43 пайыздан астамында өз баспанасы жоқ, сондықтан жалдамалы пәтерде тұрады. Елдің жер, инфрақұрылым және көлік министрлігінің хабарлауынша, 2025 жылдың қаңтарынан тамызына дейін Сеулде ай сайын пәтер жалдау бойынша 77 мыңнан астам келісім жасалған. Оның 40 пайыздан астамы айына 1 миллион воннан көп төлейді. Сондай-ақ айына 7 мың доллардан асатын 157 аса қымбат келісімшарт тіркелген. Тағы бір мәселе – ел астанасы мен өңірлердегі тұрғын үй бағасының айырмашылығы. Аймақтарда 12 арзан үйіңізді сатсаңыз да, Сеулден бір қымбат пәтер алу мүмкін емес.
Владислав Цой, тілші:
-Сеулдегі тұрғын үй бағасын төмендету және жол кептелісін азайту мақсатында мемлекеттік органдардың кеңселерін өңірлерге көшіру қолға алынған. Бұрын олардың барлығы елордада орналасқан болса, 2012 жылдан бері көпшілігі Сечжон қаласындағы үкіметтік кешенге ауыстырылған. Үкімет алдағы уақытта Сеулдегі мемлекеттік мекемелердің кеңселерін басқа қалаларға көшіруді ал ірі сеулдік компанияларды аймақтарға тартуды жалғастыруы мүмкін.
Владислав Цой, Ольга Лян
