«Таза Қазақстан» аясындағы іс-шараға Қостанай облысының тұрғындары да белсене атсалысты .
Ауқымды экологиялық акция аясында Арқалық қаласындағы білім ордаларының аумағына ағаш көшеттері егілді. Науқанға өңір басшысы Құмар Ақсақаловпен бірге Ыбырай Алтынсарин атындағы Арқалық университетінің оқытушылары мен студенттері, волонтёрлер мен қала тұрғындары қатысты.
Торғай өңірін түлету – биылғы Президент Жолдауында жүктелген жауапты міндет. Қазір аймақта бұл тапсырма ойдағыдай орындалып жатыр. Тұрғындардың экологиялық мәдениетті дамытуды көздейтін «Таза Қазақстан» акциясынан тыс қалмауы соған дәлел. Таң бозынан қолға кетпен-күрек алып, игілікті іске атсалысқандар қатарында ұстаздар әулетінің өкілі, саналы ғұмырын ұрпақ тәрбиесіне арнап келе жатқан Зинайда Шәкірқызы да бар.
Зинаида Қолдасбаева, Ыбырай Алтынсарин атындағы Арқалық педагогикалық университетінің доценті:
- Бұл акцияның мәні тереңде. Ол — ең алдымен өзімізді қоршаған ортаны таза ұстау. Міне, Арқалықтағы университет ұстаздары мен студент жастар осы акцияға белсенді қатысып жатырмыз. Кешікпей жаңа университет мәртебесін алған оқу орнымыздың ғимараты пайдалануға беріледі. Бұл да біз үшін қуаныш.
Торғай өңірінің түтіні түзу шығуына көлік қатынасын дамытуды көздейтін «Орталық – Батыс» стратегиялық автожолы оң әсер етпек. Аймақ басшысы Құмар Ақсақаловтың айтуынша, биыл Арқалықта 71 көпқабатты үйдің қасбеті мен шатыры жөнделген. Облыс бойынша 53 мың түп ағаш егілсе, соның 4 мыңы Арқалықтың ажарын аша түспек.
Данияр Қожахметов, Арқалық қаласы Жастар ресурстық орталығының директоры:
- Сенбілікке 200-ден астам қалымыздың белсенді жастары, яғни 4 колледж бен 1 университеттің студенттері шықты. Қазіргі таңда біз А. Байтұсрынұлы атындағы саябақта тұрмыз. Осы жерде 60-тан астам көшетті Арқалық қаласы политехникалық колледжінің сутденттері егіп жатыр.
Биыл Арқалық қаласында 21 мың шаршы метр аумақ абаттандырылып, 40-тан аса қараусыз ғимарат сүрілді. Жалпы «Таза Қазақстан» бағдарламасы аясында Қостанай облысының барлық аудандары мен қалаларында 22 мың түп ағаш егілген.
Авторлары: Талғат Серікқалиұлы, Ермек Мұхамедияров
