Париждің орталығында дәстүрлі даяшылар жарысы өтті. Биылғы сайысқа 400-ге жуық кәсіби даяшы мен әуесқойлар қатысты. Олардың барлығы париждік мейрамхана мәдениетіне тән классикалық үлгіде киінген: ақ көйлек, қара шалбар. Жарыс қашықтығы – 3 шақырымдық жол. Сайыстың ерекшелігі сол, жүгіруге тыйым салынған. Әр даяшы қолына табақ ұстап, үстіне бір шыныаяқ кофе, бір стақан су және круассан қойып, мүмкіндігінше жылдам жүруге тиіс.
Бұл тарихи жарыс Парижге былтыр ғана,13-жылдық үзілістен кейін қайта оралды. Ұйымдастырушылардың айтуынша, жарыстың мақсаты – Франция экономикасының маңызды бөлігі саналатын қоғамдық тамақтану саласының қызметкерлеріне құрмет көрсету.
Джиби, даяшы, жарыс жеңімпазы:
- Табақпен тез жүру маған қатты ұнады. Мұндай байқауға алғаш рет қатысып отырмын, жеңіске жеткеніме қуаныштымын. Қашықтықты 22 минутта жүріп өттім. Атмосфера керемет болды.
Андреа, даяшы, жарысқа қатысушы:
«Бұл шара даяшыларға ерекше көңіл-күй сыйлады. Біздің міндетіміз – табақпен өте шапшаң жүру, күндегі жұмысымыздағыдай. Өзім алғаш рет қатысып отырмын, әріптестерім мен басшылық қолдау білдірді.
