Шымкент әуежайында екінші ұшу-қону жолағы салынатын болды .
Стратегиялық маңызды жоба мемлекеттік сараптамадан өтті. Жоспар бойынша келесі жылдың аяғына дейін жолақ кеңейтіліп, жүк көтеру қабіледі артады. Яғни, Президент жүктеген міндетке сәйкес, әуежай мультимодальды орталыққа айналады.
Жаңа әуежай терминалы жолаушылар ағынын 10 есе арттыруға мүмкіндік берді. Халықаралық талаптарға сай болу үшін телескопиялық траптар орнатып, 6 гектар жерге перрон салынды. Ішкі рейстермен қатар шет мемлекеттерге де тікелей әуе қатынасы кеңейді.
Базаралы Тұрапов, қала тұрғыны:
- Қазір халықаралық Сеул қаласына, Будапешт сияқты үлкен-үлкен қалаларға ұшып жатқаны бізге ұнады. Бұрында 1 күн уақытымыз кететін еді. Алматыға барып, ол жерде пәлен сағат жүреміз. Қазір тікелей үйден келіп, 2-3 сағатта ұшып кетеміз. Уақыт та, ақша да үнемделеді. Сол жағы бізге қолайлы.
Әуежайды мультимодальды орталыққа айналдыру жүк тасымалы да жандануға тиіс. Ол үшін әлемнің алты бірдей транзиттік компаниясымен әріптестік орнады. Келесі жылы 6 мың шаршы метр болатын заманауи қоймалардың құрылысын аяқтау жоспарланып отыр. Сала мамандарының сөзінше, бұл экспорт пен импорт әлеуеттін арттыруға сеп болмақ.
Алик Ганеев, әуежайдың басқарма төрағасы:
- Ірі карго қоймалардың құрылысы аяқталған соң тез бұзылатын тағам өнімдерін арнайы температуралық режимде қауіпсіз сақтауға толық мүмкіндік туады. Сонымен қатар, құнды жүктердің қорғалуы қатаң бақылауға алынып, радиоактивті және қауіпті заттарға арналған жеке бөлімдер де қарастырылады. Яғни логистикалық қызметті дамытудың халықаралық стандарттарына сай болады.
Халықаралық жүк тасымалын жетілдіру үшін салынатын екінші ұшу-қону жолағының жобалық-сметалық құжаттамасы жасалды. Жоба республикалық бюджеттен қолдау тапты. Мемлекет басшысы жүктеген міндетке сәйкес әуе кемелерінің жолын жаңғырту арқылы оның жүк көтеру қабілеті 60%-ке артты.
Ролан Ибрагимов, қалалық жолаушылар көлігі және автомобиль жолдары басқармасының басшысы:
- Әкімдіктің тарапынан министрлікке өтініш жіберілді. Яғни біріңғай бюджеттік өтінім жасау және республикалық бюджеттен қаржы бөлу мақсатында. Министрлік бұл ұсынысты қолдап отыр. Программа ашылғаннан кейін біз бұл жобаны мемлекеттік сатып алу конкурсы арқылы іске асыратын боламыз.
Бас жоспарға сәйкес әуежай маңында жаңа теміржол вокзалы салынады. Ол үшін қажетті жер телімі белгіленіп, инвесторлармен іскерлік келісім жүріп жатыр. Жоба жүзеге асса әуе, көлік, жүк тасымалы бір жерге шоғырланады.
Нұрсұлтан Мұхамеджан, Нұрмахан Бекмұратов, Нұрмахан Мұсатов
