Қытай билігі қазақстандық екі майдангердің ұлдарына естелік медаль табыс етті.
Алматыдағы Жамбыл атындағы Қазақ мемлекеттік академиялық филармониясында Қытай композиторы Сянь (Си) Синхайдың туғанына 120 жыл толуына орай мерекелік концерт өтіп, онда Әбдірашев атындағы мемлекеттік академиялық симфониялық оркестрі, Байқадамов атындағы мемлекеттік хор капелласы және Жамбыл атындағы Қазақ мемлекеттік академиялық филармониясының шығармашылық ұжымы өнер көрсетті.
Шараның салтанатты ашылуында сөз алған Сыртқы істер министрлігінің ерекше тапсырмалар жөніндегі елшісі Жәнібек Әбдірашев концерттің мемлекет басшысы Қасым-Жомарт Тоқаевтың Қытай еліне сапары және оның аясында Екінші дүниежүзілік соғыстағы және жапон басқыншылығына қарсы күрестегі Жеңістің 80 жылдығына орай ұйымдастырылған әскери парадты тамашалауымен тұспа-тұс келгеніне ерекше тоқталды. Оның айтуынша, Қазақстан мен Қытай арасындағы достық пен мәдени және іскерлік байланыстар жоғары деңгейге шығып отыр және қазақ пен қытай композиторлары Бақытжан Байқадамов пен Сянь Синхайдың достығы бұл байланыстардың жарқын символы болып саналады.
Оқи отырыңыз: Алматыда Қытай сазгері Си Синхайдың ескерткіші жаңғырту жұмыстарынан кейін қайта ашылды
Алматыдағы Қытай Халық Республикасының бас консулы Цзян Вэй композитор Сянь Синхайдың өмірі Алматы қаласының тарихымен астасып жатқанын атап өтті.
"Кеңес Одағы мен Германия арасында соғыс басталғаннан кейін оның өмірі Алматыда өрілді. Осы қиын кезеңде оған қазақ музыканты Бақытжан Байқадамов көмек қолын созды. ҚХР Төрағасы Си Цзиньпин мен Қазақстан президенті Қасым-Жомарт Тоқаев бұл өзара қолдау оқиғасын жиі айтып жүреді. Екі музыкант дүниеге әкелген "Амангелді" симфониясы әлемдік фашизмге қарсы соғыстың ұранына айналса, екеуінің достығы Қытай мен Қазақстанның мәңгілік достығының үлгісі саналады", – деді Цзян Вэй.
Бас консул биыл, сондай-ақ Екінші дүниежүзілік соғыстағы және жапон басқыншылығына қарсы күрестегі Жеңістің 80 жылдығы екенін еске салып, бұл соғыста Қытай мен Қазақстан халқы да майданда иық тіресіп, фашизмге қарсы күрескенін атады. Осы ретте Цзян Вэй ҚХР үкіметінің атынан қазақстандық екі майдангер Майхан Әренов пен Әбдібек Нұрмағамбетовты "Екінші дүниежүзілік соғыстағы және жапон басқыншылығына қарсы күрестегі Жеңіске – 80 жыл" естелік медалімен марапаттады. Медаль майдангерлердің ұлдары Мұрат Әренов пен Мақсат Нұрмағамбетовке табысталды.
"Қытай барша халықаралық достарға, оның ішінде Қазақстан халқына соғыстың ауыр жылдары қытай халқына баға жетпес қолдау көрсеткені үшін алғыс айтады", – деді бас консул.
Концертке жиналған қауым Сянь Синхай мен Бақытжан Байқадамовтың "Амангелді" симфониясын, "Қазақ биі", "Су тасушы қыз", "Би күйі", "Сарыөзен" және өзге де шығармаларды тамашалады.
