Букмекерлерді жарнамалауға Өзбекстанда да тыйым салынған.
Елдің бәсекелестік комитеті күнделікті әлеуметтік желілерде мониторинг жүргізіп, жарнамаларға талдау жасап отырады. Егер қандай да бір заңбұзушылық анықталса, сайттар бұғатталып, айыптылар әкімшілік жазаға тартылады. Жуырда әрқайсысының жүз мыңға жуық жазылушысы бар төрт блогердің букмекерлерді жарнамалағаны анықталды. Сот оларды кінәлі — деп тауып, қомақты айыппұл салды.
Өзбекстанда 2025 жылдан бастап букмекерлердің жұмысы мемлекеттің толық бақылауына алынды. Онлайн жұмыс істеуге рұқсат берілгенімен талаптар күшейтіліп, заңсыз жұмыс істеп келген 40-қа жуық шетелдік сайт бұғатталды. Жаңа ережеге сай, букмекерлік кеңеселер елде заң бойынша тіркеліп, лицензия алуы тиіс және олардың жарғылық капиталы 150 мың доллардан кем болмауы тиіс. Ал ең басты талап букмекерлік орталықтың құрылтайшылығы Өзбекстан азаматына тіркелуі керек. Сондай-ақ «Жарнама» туралы заңға өзгертулермен толықтырулар енгізіліп, букмекерлерге жарнама жасауға тыйым салынды. Яғни көшелерде, бұқаралық ақпарат құралдарында, тіпті интернет желілерінде құмар ойындарды насихаттауға болмайды. Жуырда Ташкенттің екі блогері осындай күдікке ілініп, сот олардың әрекетін заңсыз деп тапты. Әкімшілік жаза тағайындалып, шамамен 34 млн сум айыппұл салынды. Елдің бәсекелестік комитетіне әлеуметтік желілерде мониторинг жүргізіп, заң бұзғандарды анықтауға құзірет берілген. Алайда желіні толық қамту мүмкін емес. Азаматтардың тыйым салынған шетел букмекерлерінің платформасына тіркелу фактілері кездесіп отыр. Жалпы жарнама туралы заңды талқылау барысында 10 шақты Олий мажлис депутаты заңның шикі екенін айтып, дауыс бермеген болатын. Олардың пайымынша, құмар ойындар жайлы жарнама мазмұнында жылдам пайда табу жағы ғана айтылмай, ойынның зияны да қатар насихатталуы тиіс. Жалпы Орталық Азия елдерінің ішінде Қырғызстанда ғана букмекерлердің жұмыс істеуіне заңмен тыйым салынған. Алайда ол тұрғындардың басқа елдің онлайн платформаларына тіркеліп, құмар ойындарды ойнауына кедергі емес.
