Аралдың құрғаған табанына 660 мың гектар сексеуіл егілді.
Бұл жұмыс Президенттің тапсырмасына сәйкес жүргізіліп жатыр. 2021-2025 жылдар аралығында 1 миллион 100 мың гектар жерді жасыл желекпен көмкеру жоспарланған. Теңіздің тартылып қалған бөлігінің жалпы аумағы 6 миллион гектар. Оның 2,8 миллионы Қазақстанға тиесілі. Теңіз тартылған жерге сексеуіл егу 1990 жылы басталған. 2020 жылға дейін 337 мың гектарға сексеуіл егілген. Орман шаруашылығы мекемелері соңғы бес жылда аталған аумақты көгалдандыру жұмыстарын қарқынды жалғастырып келеді. Бүгінде 49 миллион түп сексеуіл егілді. Мамандардың айтуынша, әрбір түп сексеуіл 4-5 тонна құмның көшуін тоқтатады.
Қайрат Жансұлтанұлы, Табиғи ресурстар және табиғат пайдалануды реттеу басқармасы басшысының орынбасары:
- Барлық орман шаруашылығы мекемелері оған қатысты көшеттермен қамтамасыз етуде. Қазіргі таңда бізде 8 уақытша тұқымбақтар бар. Жылына 148 мың гектар жерге көшеттер егіп, одан кейін Арал теңізінің ұлтанына барып, оларды отырғызамыз. Сонымен қатар барлық орман шаруашылығы мекемелері, қажетті тұқымдарын дайындайды. Бұл жұмыстарды біз жыл сайын атқарып келеміз. Биыл 440 мың гектар жерге сексеуіл көшеттерін отырғызу жоспарымызда бар. Оны жүргізіп келе жатырмыз.
