Пластик қалдықтардан төнген қауіп күн санап артып келеді. Бұған жаңа сараптамалық зерттеудің нәтижесі дәлел.
Кейінгі 25 жылда пластмасса өндірісі 200 есе өсті. Сарапшылар ескертеді: адамзат жыл сайын денсаулыққа 1,5 трлн доллар шығын келтіретін пластикалық қалдықтар дағдарысына тап болды. Әсіресе бір рет қана қолданылатын өнімдер — сусын бөтелкелері мен фаст-фуд контейнерлерінің өндірісі тез дамып, қауіп төндіруде. 2060 жылға қарай пластмасса өндірісі шамамен 3 есеге артып, жылына миллиард тоннадан асады, делінген зерттеуде.
Пластик ауаны ластайды, улайды және ағзаға микропластиктердің енуіне ықпал етеді. Тіпті қоқысқа тасталған ыдыстағы суға масалар үймелеп, түрлі аурулардың таралуына жағдай жасайды. The Lancet журналында жарияланған ғылыми шолу Пластик өндірісін бақылауда ұстау туралы жаһандық келісім бойынша келіссөздер алдында жарық көрді. Бірақ басқосуға қатысушы елдердің ұстанымы әрқилы: 100-ден астам мемлекет қатаң шектеулерді қолдаса, Сауд Арабиясы сияқты ірі мұнай өндірушілер бұл бастамаға қарсы.
Филип Ландриган, ғылыми мақаланың бас авторы:
- Жаңа келісім пластиктің денсаулыққа қауіп төндіретін тұстарын ескергені өте маңызды. Пластмасса балалар мен халықтың осал топтарына үлкен зиян келтіруде. Біз бұған жауаптымыз және батыл әрекет етуіміз керек.
Әлемде пластикалық қалдықтардың 10 пайызға жетер-жетпесі ғана қайта өңделеді. Ғалымдар микропластик пен бір киіп тастайтын сәннің кең тарауына алаңдаулы. Олар тұтынушыларды экологиялық өнімдерді ғана таңдауға және бренд туралы ақпаратты алдын ала тексеруге шақырады.
Джеймс Штернберг, Клемсон университетінің Тұрақты даму бойынша сарапшысы:
- Біраз брендтің қоршаған ортаны қорғау үшін не істеп жатқанын баяндап отыратын бөлімі бар, бірақ бұл көбіне маркетинг элементі ретінде ғана жұмыс істейді.
Жаңа сараптама — халықаралық экологиялық саясатты қалыптастыру құралы болатын тұрақты шолулар тізбегінің біріншісі. Ол пластикалық қалдықтармен күресудің тиімді саясатын әзірлеу үшін сенімді дереккөз болмақ.
