Маңғыстауда «Білім келешегі: Адал азамат, кәсіби маман» тақырыбында білім беру қызметкерлерінің дәстүрлі тамыз конференциясы өтті, деп хабарлайды 24kz.

Кеңеске облыс әкімі Нұрдәулет Қилыбай, ҚР Оқу-ағарту министрлігінің өкілдері, еліміз бен шетелдік жоғарғы оқу орындарының ғалымдары, білім беру және еңбек нарығы саласындағы халықаралық сарапшылар, сондай-ақ 700-ден астам білім беру ұйымдарының басшылары мен сала қызметкерлері қатысты. Ұлттық бірыңғай тестілеу нәтижесі бойынша биыл 3464 түлек грант иегері атанды. Бұл өңірде білім сапасының өткен жылдармен салыстырғанда айтарлықтай жақсарғанын көрсетіп отыр.

Талғат Серікқалиұлы, тілші:

- IT саласына арнап ұйымдастырылған көрмеде отандық және шетелдік компаниялар өз технологиялық жаңалықтарын таныстырды. Ал, панельдік сессияда маңғыстаулық түлектер мен халықаралық сарапшылар білім беруді дамыту, әлемдік стандарттар және жасанды интеллектіні тиімді қолдану бойынша пікір алмасты.

Меруерт Бижанова, Оксфорд университетінің докторанты (АҚШ):

- Шетелде жасанды интеллектіні қуана қарсы алады, Қазақстанда кішкене әлі де жасқаншақтық бар, ЖИ, АI деген нәрсе болса, қашқақтауға тырысамыз, негативті тұрғыда қараймыз. Бірақ Америкада керісінше, чат GPT деген нәрсенің бәрі Қытай, Америкадан шығып жатыр, олар керісінше, әлемнің талабы екенін түсінеді.

Биылғы оқу жылынан бастап арнайы курстан өткен 50 мектептің директоры цифрландыру бойынша ең дамыған Сингапур мен Қытайға тәжірибе алмасуға жіберілмек. Сонымен қатар 30 мектеп оқушысы «Американың IT компанияларында тағылымдамадан өтеді», — деді өңір басшысы Нұрдәулет Қилыбай.

Нұрдәулет Қилыбай, Маңғыстау облысының әкімі:

- Қоғам тарапынан, ата-аналар тарапынан ұстаздардың басын ешкім қатырмауы керек. Қалай болғанда да цифрландырудан, жасанды интеллектіден біз ешқайда қашып құтыла алмаймыз. Ол болашақтың талабы болады. ҰБТ бойынша Маңғыстау облысы ең соңғы орын деп неше жыл қақсап келдік, биыл бірнеше позицияға көтерілдік. Цифрмен жұмыс істеуді мына кісілер дәлелдеп тұр.

Конференцияда өңірдегі үздік білім беру ұйымдары мен шәкірт тәрбиелеу ісінде дараланғандар еңбегі ескерілді. Ұстаздар «Шапағат» орденімен, «Білім беру саласының құрметті қызметкері» төсбелгісімен, сондай ақ министрлік және облыс әкімінің Алғыс хаттарымен марапатталды.

Авторлары: Талғат Серікқалиұлы, Ренат Досалиев