Батыс Қазақстан облысында спорт саласына жыл сайын қомақты қаржы бөлінсе де, спорт нысандарының жай-күйі әлі күнге көңіл көншітпейді.
Мәселен, байдарка мен каноэде есуге баулитын мектеп 1956 жылғы ескі ғимаратта орналасқан. Заманауи кешен салынады деп осыдан екі жыл бұрын уәде берілген еді. Ал аталған спорт түрімен айналысатын батысқазақстандық балғындар тек биылдың өзінде ел біріншіліктерінен 50 жүлде жеңіп алды.
Айдында жеңіл қалықтаған қайықтар, бұлшық еті ойнаған ескекшілер. Байдарка мен каноэ есу Еуропа елдерінде корольдік спорт түрі саналады. Аталған спорт түріне қызығушылар Оралда да аз емес. Күн сайын олимпиадалық резевртер даярлайтын спорт мектебінің табалдырығын жаңадан 3-4 бала аттайды. Олардың бәрі тегін айналысады. Бір жылдан кейін көзге түскендері осында тұрақты қалады. Ал нәтиже көрсетпегендері каноэмен қош айтысады.
Артур Үмбетқалиев, Олимпиадалық резервтер даярлайтын спорт мектебінің директоры:
- Бұл спорттың өзінің адамдары бар. Күрес түрлерінен ауысып келіп жатқан спортшылар бар. Күреспен айналысып, оларға ол жақта қызық емес, осы жақта қызық дегендей. Қымбат спорт түрі деп айтуға болады. Себебі қайықтар арзан тұрмайды. Аз ақша тұрмайды. Былтыр төрттік қайық алдық. 15 млн 500 мыңға алдық.
Никон Дергунов қазақстандық танымал ескек есуші, Азия чемпионы, Олимпиада қатысушысы Алексей Дергуновтың ұлы. Бірнеше мәрте ел біріншілігінде топ жарыпты.
Никон Дергунов, спортшы:
- Мен бұған дейін Азербайжандағы халықаралық жарыстың алтынын олжаладым. Келешекте әлем чемпионатына қатысу менің арманым. Өскенде олмапиадаға жолдама алсам деймін.
Николай Иванов, Байдарка мен Каноэ есуден аға жаттықтырушы:
- Оралда байдарка мен каноэда есумен айналысқысы келетін балалар өте көп. Бірақ бізде олардың бәрін қабылдайтын жағдай жоқ. Себебі база өте ескі әрі тар. Міне, бүгін бізде 50 бала келді. Соның өзі шақ сыйды. Бәріне бірдей байдарка мен каноэ де жетпейді.
Ескек есу кезінде адам денесінің 85%-не күш түседі екен. Аталған спорт түрімен айналысқандардың сымбатты келетіні де сондықтан дейді мамандар. Орал қаласы отандық байдарка мен каноэда есудің тірегі саналады. Бірақ спорт мектебінің қазіргі жайы сын көтермейді. 70 жыл бұрын салынған ғимарат тар әрі тозығы жеткен.
Юрий Казанин, Байдарка мен Каноэде есу федерациясының президенті:
- Бізге заманауи база керек. Толыққанды кешен қажет. Жаттықтырушылар санын арттырған абзал. Қазір 7 жаттықтырушы бар. Негізі олардың санын 20-ға жеткізсе, балаларды толық қамтуға болады. Бізге биліктегілер мына мектепті жаңғырту туралы айтқанына біраз болды. Бірақ 2023-те қаржы болмады, былтыр су тасқыны деді. Енді осы түйінді мәселе көп кешікпей шешілсе екен.
«Оралдық ескек есу спортының жұлдыз қашан жанады? Аталған сауалдың жауабы спорт мектебі ғимаратының жаңғыртуға тікелей қатысты», — дейді мамандар.
Бақдәулет Сәбитов, БҚО Дене шынықтыру және спорт басқармасының басшысы:
- Инфрақұрылым бойынша көрдіңіздер, паркте біздің ғимаратымыз бар. Ол енді керемет деп айта алмаймын. Ол реконструкцияны талап етіп отыр. Үлкен бір капремонт талап еткені бар. Жылдан жылға жағдай жасап жатырмыз күш жеткенше. Бірақ биылға емес, келесі жылға жоспарлап жатырмыз.
Жалпы өңірде спорттық инфрақұрылымды дамытуға соңғы жылдары мықтап мән беріліп келеді. Биыл 10 спорт нысанының құрылысы басталыпты. Соның 9-ы жеке инвестицияға бой көтермек.
Е. Жылқайдарұлы, Б. Жарылгасов, Қ. Ақрап, 24KZ
