Шардара қаласында отыз мыңнан астам тұрғын 2 күн бойы сусыз отырды, деп хабарлайды 24kz.

Мұнда тіршілік нәрі Шардара су қоймасынан берілетін. Алайда қазір, қоймадағы су көлемі азайып, деңгейі түсіп кеткен. Жергілікті билік мәселені қалай шешіп жатыр? Мұндай жағдай тағы қайталануы мүмкін бе?

Жандос Жұмабек, тілші:

- Шардара – Түркістан облысындағы ауызсуды ашық су айдынынан алатын жалғыз аудан. Бастауын Тянь-Шань тауларынан алатын Сырдария өзенінде биыл су аз. Шардара су қоймасының да түбі көріне бастады. Салдарынан тіршілік нәрін өңдеп, тұтас қаланы ауызсумен қамтып отырған станцияға суға жетпей қалды. Қала тіршілік нәрінсіз қалды. Шұғыл штаб құрылып, халықа ауызсу тасымалдап, жеткізілді.

Анарбай Құршанов, аудан тұрғыны:

- Су жоқ, тасып ішеміз. Колонка тоқтап қалған. Міне, көлігімізбен тасып ішіп жатырмыз. Дарияның суы болмайды. Жердің астынан қазсақ, ащы. Колонканың суы ағып жатқан жоқ, аққанымен ішуге жарамсыз, бақша суғаруға ғана жарайды.

Көпқабатты тұрғын үйлердің ауласына 2 тонналық 28 дана су жинау ыдысы орнатылып, су толтырылған. Оған 15 водовоз жұмылдырылыпты. Қазір қала тұрғындары қажетті суды осы ыдыстардан алып жатыр.

Клара Жатпаева, қала тұрғыны:

- Осы күнге дейін ауызсу тапшылығы болды. Ауызсуды бізге осы 2 тонналық резервуар арқылы әкеліп, үнемі құйып отырды. Водовоз келіп отырды. Соның арқасында судан тапшылық көрген жоқпыз.

Бейбіт Бақтыбаев, қала тұрғыны:

- Су бір 2-3 күн болмай қалды. Енді суды барынша үнемдеп жатырмыз. Ахуал су тапшы болып басталды, осы көпшіліктің арқасында сумен қамтамасыз етілді.

Шардара қаласында 85 көпқабатты тұрғын үй, 32 мың халық тұрады. Одан бөлек, оннан астам түрлі әлеуметтік нысан жұмыс істейді. Қазір қаланың бас су торабын баламалы су көзімен толтыру үшін Шардара су қоймасынан диаметрі 200 мм полиэтилен құбырлар арқылы насоспен тіршілік нәрі жеткізіліп жатыр.

Зұлпыхар Жолдасов, облыс әкімінің бірінші орынбасары:

- Біз осы құбырмен суды қалаға апарып жатырмыз. Негізі қалада жек секторды бәрін есептегенде 6 мыңға жуық абонент бар. Біз қазір тағы да бір двигитель қойып, ттағы бір құбырды тартып жатырмыз. Сонда қаланы толық қамтамасыз ететін болады. Қазір көпқабатты үйлерге су толық барып жатыр.

Бүгін қаладағы барлық шағынауданда су қалыпты беріліп жатыр. Тұрғын үйлерге судың үздіксіз берілуін қамтамасыз ету мақсатында қосымша 28 су жинау резервуары орнатылды. «Сонымен қатар тәулік бойы 10 арнайы су тасымалдайтын көлік жұмыс істеп жатыр», - дейді жауаптылар.

Авторлары: Жандос Жұмабек, Ерболат Әбіш