Биыл жарты жылда жалдамалы тұрғын үй қоры 515 пәтерге толықты.
Айта кету керек, соңғы алты жылда табысы төмен 77 мыңнан астам отбасы жалдамалы баспанаға қол жеткізген. Сондай-ақ 2019 жылдан бері «Отбасы банк» арқылы баспанаға мұқтаж 22 мыңнан астам азаматқа екі пайыздық мөлшерлемемен ипотека берілді. Тағы 58 мыңнан астамы 5%-дық мөлшерлемемен үй алған. Биыл алты айда 1 245 қазақстандық екі пайыздық мөлшерлемемен ипотека рәсімдесе, 1900-ге жуығы 5 пайыздық мөлшерлемемен алыпты. Өнеркәсіп және құрылыс министрлігінің мәліметінше, соңғы алты жылда тұрғын үй құрылысына 15,4 трлн теңге жұмсалды. Ал биыл алты айда құрылыс саласына 1,5 трлн теңге көлемінде инвестиция құйылды.
Финляндияда өтіп жатқан халықаралық көрмеде қазақ тазысы таныстырылды. Елден іріктеліп алынған сегіз құмай тазы жеңімпаз атағы үшін бақ сынайды. Көрме есігі кеше ашылды. Ал, үздіктер 10-шы тамызда анықталады. Қазақстандық команда халқымыздың мәдени символын жаһан жұртына көрсету үшін Хельсинкиге 1 тамызда жол тартты. Былтыр Амстердамдағы халықаралық кинологиялық федерацияның шешімі бойынша, Қазақстан ресми түрде тазы тұқымының иесі деп танылды. Федерацияның талабына сәйкес, алдағы 10 жылда еліміз оның санын көбейтіп, халықаралық жарыстарға қатысуға тиіс.
