Абайдың 180 жылдығына орай өтіп жатқан мәдени шаралар легінен Ташкенттегі қаламгерлер де шет қалмады. Өзбекстан Жазушылар одағының бастамасымен ұлы ақынның шығармалары өзбек тіліне аударылып жатыр. Түркі тілдес елдер әдебиетінің інжу-маржаны саналатын 100 томдық таңдаулы шығармалар жинағы жарық көрсе, соның 10 томы қазақ әдебиеті өкілдеріне тиесілі.
Екі ел арасындағы мәдени, рухани қарым-қатынас жыл өткен сайын нығайып келеді. Мұның бір дәлелі, ұлы ойшыл Абай Құнанбаевтың айтулы мерейтойына деген өзбек ағайынның ықыласы. Бауырлас елдегі қалам ұстаған қауым ақынды өз шайыры секілді құрмет тұтады. Бес жыл бұрын Абайдың 175 жылдығы қарсаңында Қара сөздері тәржімаланған еді. Игі іс биыл да жалғасын тауып жатыр.
Тұрсынәлі Ахметов, Өзбекстан Жазушылар одағы Қазақ әдебиеті кеңесінің төрағасы:
Өзбекстандық танымал әдебиет зерттеуші, ғалым Бахадыр Каримов 38-қарасөзі «Тасдиқты» қайта аударма жасап жеке кітап ретінде дайындап шықты. Жуық арада баспадан шығарайын деп отырмыз. Бұл да Абайдың мерейтойына тамаша тарту болады деп ойлаймыз.
Абай бізге бөтен емес. Осылай деген өзбек ақын жазушылары хакімнің шығармаларына барынша қанық. Өскелең ұрпаққа ұлы ойшыл жазып қалдырған дүниелердің берері әлі де мол екеніне тоқталды. Қазақстанның Өзбекстандағы елшісі Жазушылар одағына арнайы барып, мерейтойға орай өтетін шаралар туралы хабардар болды. Екі тарап бір біріне аса құнды қазына кітап сыйлады.
Ғайрат Мажид, Өзбекстан Жазушылар одағы төрағасының орынбасары:
Әдебиет, сөз өнері ұлт пен ұлысты бір біріне жақындатып, бауырластықты одан әрі арттыратын құдіретті өнер. Өзбекстан жазушылар одағының бастамасымен Абайдың таңдаулы шығармаларын өз тілімізге аудару жобасы бұдан бұрын да қолға алынған. Бұл игі іс әрдайым жалғасын табады.
Өзбекстандағы қазақ қаламгерлерінің қатары уақыт санап артып келеді. Мұндағы шығармашыл орта төл әдебиетіміздің дамуына үлес қосып жүр. Он үш қандасымыз Өзбекстанның Жазушылар одағына мүше атанған. Өткен жылы 20 ақын-жазушының кітабы жарық көріп, жинақтар осы елдегі қазақ мектептеріне тегін таратылды.
Базаркүл Отыншиева
