Кезінде жабық әскери қала болған Приозерскіге жаз айларында 9 мың демалушы келген .

Бұл былтырмен салыстырғанда 2 мың адамға көп. Алайда барлығына бірдей сапалы қызмет көрсетуге туристік нысандардың шамасы жетпейді. Балқаштың жағалауындағы шаһардың экономикасын әртараптандырудың тиімді тетігі-туризмді дамыту, дейді мамандар. Осы орайда жаңадан демалыс орнын салғысы келетін кәсіпкерлерге көл жағалауынан жер телімі берілмек.

Нұрсұлтан Бекболатұлы туризм бағытындағы жобасын қорғап, былтыр көлге жақын жер алып, күніне 60 адамға қызмет көрсететін қонақ үй кешенін ашты. Кәсіптің бұл түріне енді кіріскен ол біраз мәселе мемлекеттік қолдаудың арқасында шешілгенін айтады.

Нұрсұлтан Бекболатұлы, кәсіпкер:

- Біз құжаттарымызды, өтінішімізді тапсырдық. Бізге қаржылай көмек берді. Жеңілдетілген аз пайызды кредит ұсынды бізге, соны пайдаланып осындай үлкен ғимарат салдық. Инфрақұрылымға келгенде бұл жер толықтай орталық жылу жүйесіне қосылған. Су барлығы акиматпен бірге жасалған дүниелер, светті де жақын жерден тарттық. Көмектері өте көп.

Қалада 10 қонақ үй кешені жұмыс істеп тұр. Олар күніне 423 адамға қызмет көрсете алады. Алайда бұл аз. Маусым, шілде айларында қалаға 9 мың адам келді. Бұл былтырға қарағанда 2 мың адамға көп. Демалушылар қонақ үйден бөлме мен жалға пәтер таппай әбігерге түсті. Болашақта қаланың бас жоспарына өзгерістер енгізіледі. Құжатта кәсіпкерлік салаға 40 пайызға дейін басымдық беріледі, дейді жергілікті билік өкілдері. Мысалы, көл жағалауынан туризмді дамыту үшін 30 гектар жер белгіленіп отыр.

Мансұр Ахметов, Приозерск қаласының әкімі:

- Бүгінгі таңда қалаға әлеуетті инвесторлар ауадай қажет. Шағын және орта бизнес дамып келеді. Бірақ туристердің сұранысы жылдан-жылға артып отыр. Шілде, тамыз айларында келген әр он адамның тек төртеуіне ғана орын тауып бере аламыз. Сіресе аптап ыстықтарда демалуға келушілер өте көп болды. Сондықтан 30 гектар жерді белгілеп қойдық. Ол жерлерді келген инвесторларға демалыс орындарын салуға береміз.

Былтыр қалаға 30 мың адам келді. 2023 жылға қарағанда демалушылар саны 22 пайызға артқан. «Қарағанды-Алматы» бағытындағы тас жол жөнделгелі туристер тіпті көбейіпті. Осыған байланысты жергілкті билік жанармай бекетін, логистикалық кешен, қоғамдық тамақтану орнын салуға ниетті кәсіпкерлермен келіссөздер жүргізіп жатыр.

Руслан Нұрланұлы, Сайран Ақамбаев, Аман Хамит