Абай облысында ала қоңыз қаптады. Күн қызғанда шығатын зиянкестер жасыл желекті отап, бау-бақшаны түгел кеміріп тастаған, — деп хабарлайды Massaget.kz тілшісі "КТК" телеарнасына сілтеме жасап.
"Алдында жерді өңдегенмін. Күн ысығанда қайта қаптайды. Қараңызшы, қаншама дәрі?! Малға себетін дәрімізді себеміз. Үкіметтен көмек сұраймыз. Улағаннан пайда жоқ. Даладан ұшып келеді", — деді Мұқыр ауылының тұрғыны Әлия Жүнісова.
Қара және қызыл түсті қоңыздан жеті ауылдың тұрғындары қатты зардап шегіп отыр. Бау-бақша мен жасыл желекті отап тастаған зиянкестер адамдарды да шағады екен, тұрғындар баласын далаға шығарудан қалған.
Бірақ мамандар "Шпанка" деп аталатын бұл қоңыздан адамға төнетін қауіп жоқ", — дейді.
Сондықтан оны улауға және дәрі шашуға бюджеттен қаржы бөлінбейді.
"Шегірткеге ғана ақша бөледі. Өйткені олар көп зиян келтіреді. Ауыл шаруашылығына, халыққа. Ал бұл қоңыздар көп жерде болмайды. Жылына біресе ана жерде, біресе мына жерде шығады. Бюджеттен ақша бөлінбейді. Сондықтан жергілікті әкімдіктер бұл жұмысты ұйымдастыруы керек", — деді Абай облысы ауыл шаруашылығы басқармасы басшысының орынбасары Ербол Қуанышев.
Қызықты жаңалықтар мен видеоларды көру үшін TikTok арнамызға жазылыңыз!
