Каспий жағасында ауқымды тазалық акциясы өтті.
Ақтау түбіндегі жағажайларды қоқыстан тазалауға 400-ге тарта адам атсалысты. «Таза Қазақстан» эконауқанына қатысушылар ішінде «Жасыл ел» қозғалысының еріктілері, коммуналдық сала жұмысшылары, мемлекеттік қызметшілер мен қала тұрғындары бар. Олар қоқыс жинаудан бөлек демалушыларға қоршаған ортаның тазалығын сақтау қажеттігін түсіндірді.
Мына ашық жағажай Ақтаудан 30 шақырым жерде орналасқан. Мөлдір су мен құмды жағалауда ала жаздай адам қарасы үзілмейді. Бірақ кей демалушылар қоқысты көрінген жерде қалдырып кетеді. 400-ге тарта табиғат жанашырлары бүгін 3 шақырымға созылған жағажайдағы тазалап шықты.
Ақмарал Сүйінбаева, волонтёр:
- Акиматтың акциясы болып жатыр «Таза Қазақстан» деген. Соған біздер қатысып, қасымыздағы адамдармен бірге келіп, осы пляжды тазалап жатқанымыз. Теңіз өте керемет, біздің қаламыз, пляждарымыз әрқашан осылай таза болып жүрсін.
Жылы жағажай халық жиі баратын орындардың бірі. Өткен демалыс күндері мұнда 8 мың көлік пен 30 мың адам келген. Өкініштісі, олардың арасында қоқысты самсап тұрған контейнерге тастауға ерініп, аяқ астына лақтыратындар жеткілікті.
Тілеген Әбішев, Маңғыстау облысы әкімінің орынбасары:
- Шомылу маусымы басталғалы бері табиғатты қорғау полициясы тарапынан мыңға жуық хаттама толтырылған 70 млн теңгеге жуық сомаға. Бірақ сонда да демалушылардың осы табиғатты аялауға қатысты деректері тиылмай отыр. Біздің мақсатымыз осы жердегі Каспий теңізінің жағалауын қоқыс қалдықтарынан тазарту. Жасыратыны жоқ, демалғаннан кейін соңдарын жинамай кетеді, сәйкесінше осы жерде тау-тау үйілген қоқыс қалдықтарын біз өзіміз жинап жүрміз.
Жағажайды күнделікті 80 жұмысшы жинайды. Оларға көмекке келген еріктілер 12 тонна қоқыс шығарды.
Тамара Степанова, Саламат Бекбаев
