Бүгін Перизат Қайрат пен анасы Ғайни Алашбаева сот үкімі шықты.
Енді қызы алдағы 10, анасы 7 жылын түрмеде өткізеді. Екеуі де жазасын қауіпсіздігі орташа мекемеде өтейді. Бүгін Астана апта бойына жалғасқан атышулы істің нүктесі қойылды. Отырыс аяқталған соң іле-шала сотталушының қорғаушысы үкіммен келіспейтінін айтып қарсылық білдірді. Асланбек Дәулетияров сотта тиісті дәлелдер ұсынылмағанын БАҚ өкілдеріне баяндап берді.
Қоғамда резонанс тудырған тағы бір сот отырысына нүкте қойылды. Перизат Қайрат ісі қарашаның қайырымдылыққа деген сеніміне селкеу түсіргені анық. Анасы мен қызы бірігіп халықтан түскен 3,5 миллиард теңгені жеке пайдасына жұмсаған. Прокурор түзген тізімде не жоқ дейсің?! Бәрі бар. Шалқып өмір сүруге кеткен миллиондардан жаңылуға болады. Ұрланған қаражатқа сатып алған мүлкі толық тәркіленді.
- Перизат Қайрат кінәлі деп танылып, 10 жыл бас бостандығынан айыру жазасын, сот үкімімен К. мен А. 10 жыл мерзімге қайырымдылық қаражаттарын жинаумен байланысты қызметпен айналысу құқығынан айырылды.
Перизат Қайрат енді алдағы 10 жылын түрмеде өткізеді.
Ал анасы Ғайни Алашбаеваға 7 жыл бас бостандығынан айыру жаза мерзімі берілді. Екеуі де жазасын қауіпсіздігі орташа мекемеде өтейді. Астананың қылмыстық істер жөніндегі ауданаралық сотында судья Сабыржан Кәрімов сотталушыларға қатысты үкімді жария еткені сол еді, артынша сотталушының қорғаушысы үкіммен келіспейтінін айтты.
Асланбек Дәулетияров, қорғаушы:
- Міндетті түрде береміз апелляцияға. Үкіммен келіспейміз. Үлгірген жоқпыз сөйлесуге.
Сот үкіміне сәйкес, Перизаттың мүлкі толық тәркіленді. Бұл қатарда коттедж қалашығындағы жеке үй мен Астанадағы 4 пәтер, құны қымбат 4 көлік бар. 97 млн теңгеден астам қаражат пен 22 мың АҚШ доллары да қайтарылады. Қоғам белсендісі боп жүріп кеудесіне таққан "Шапағат" медалінен де айырылды.
Кәмшат Мұхамеджан, Диас Қовланбаев, Нұрғали Мамырбаев
