Еліміз жылыту маусымына 65% дайын. «QazaqGaz» ҰК» басқарма төрағасы Санжар Жаркешов осылай деді. Оның айтуынша, бүгінде жылу жүйелерінің жөндеу жұмыстары кестеге сай жүргізіліп жатыр.
«QazaqGaz» басшылығы бүгін Астана қаласы мен Ақмола облысының жылыту маусымына дайындығын тексеруге шықты. Санжар Жаркенов мердігер компания өкілдерімен кездесіп, жұмыс бекітілген кестеге сай жүргізіліп жатқанына көз жеткізді.
Санжар Жаркешов, «QazaqGaz» ҰК» басқарма төрағасы:
- Негізі бұл «QazaqGaz» ұлттық компаниясының және Ақмола облысы әкімдігінің бірлескен командалық жұмысы. Әсіресе әкімдіктің жұмысы өте зор болды. Қазіргі уақытта мердігер компаниямен үлкен жұмыстар жасалып жатыр. Өйткені Қосшы елді мекенінің газдандыру мәселесі – Мемлекет басшысының тікелей тапсырмасы. Алдағы күзгі-қысқы жыл басталмай тұрып, Қосшы қаласының бірінші кезең газы қосылады.
Қысқы мезгілде газ инфрақұрылымының беріктігі маңызды. «Сондықтан жұмыстар техникалық нормалар мен мерзімдерді қатаң сақтай отырып жүргізіледі», – дейді мамандар.
Нұрболат Мерғалиев, «QazaqGaz Aimaq» АҚ Астана филиалы өндірістік-техникалық бөлім басшысы:
- Жоба үш бөлікке бөлінген. Қазір 2 шақырым жоғары қысымдағы, 38 шақырым орта қысымдағы құбыр салынды. Сонымен қатар 14 газ қысымын реттеу пункті орнатылды. Жалпы 48 пункт болады. Олар құбырдағы қысымды жоғарыдан орта деңгейге дейін түсіреді. Бұан бөлек, 120 шақырым төмен қысымдағы құбыр салынды.
QazaqGaz компаниялар тобы халықты газбен үздіксіз қамтамасыз ету мақсатында кешенді шараларды қолға алған. Қазір Family Village тұрғын алабы мен Оңтүстік-Шығыс, Көктал-1, Интернациональный, Железнодорожный шағынауданында да жұмыстар жүріп жатыр. Жылыту кезеңіне дайындықты тамыз айының соңына жоспарланған.
Авторлары: Серік Селеубайұлы, Бағдат Қайыркен
