Сотта куәгер Аслан Боранбаев су тасқыны кезінде оған жақын досы Адильхан Мусиннің жүгінгенін айтты, деп хабарлайды Skifnews.kz ақпарат порталы.
«Ол жағдайды түсіндірді, Перизат Қайратқа көмектесу керек деді. “ИП керек” деді. Мен оны жақсы білемін, жақын досым. “Жарайды, көмектесемін” дедім», — деді Боранбаев сотта.
Боранбаевтың ИП-шотына бір траншпен 70 млн теңге түскен. Ол ақшаны шешіп алып, Мусинге бергенін айтты. Оның айтуынша, бұл үшін ешқандай ақы алмаған. Ал Перизат Қайратпен тек досы арқылы таныс болған.
Сол сотта куәгер Римма Суюндыкова да жауап берді. Ол — Мусиннің қайыненесі. Оның айтуынша, ақшаны оның ИП арқылы да өткізуге тырысқан. Бастапқыда ол келіспеген, бірақ Мусин: «Бұл — Biz Birgemiz Qazaqstan 2030. Адамдарға көмектесетін қор ғой», — деп көндірген.
Оның шотына алдымен 20 млн теңге түскен, кейін ИП атауын ауыстыруды сұраған.
«ИП Nails Shop — бәрі маникюрге арналған деп тұрды, “жарамсыз” деді. “Дереу 50 млн шешіп ала алмаймыз, алдымен 20 млн шешіп алайық, қалғанын атауды ауыстырған соң аласын” деді», — деді Суюндыкова.
Атауын өзгерткеннен кейін оның шотына тағы 52,5 млн теңге түскен. Ол бұл ақшаны да шешіп алып, Мусин мен Боранбаевқа берген. Айтуынша, ол да бұл үшін ешқандай сыйақы алмаған.
