Қаржы мониторингі агенттігі төрағасының орынбасары Жеңіс Елемесов Biz Birgemiz қорының басшысы Перизат Қайратқа қатысты қылмыстық іс туралы айтып берді, — деп хабарлайды Massaget.kz тілшісі.
Жеңіс Елемесовтың айтуынша, бұл резонансты іс жүзден аса томнан тұрады. АФМ басшысының орынбасарының мәлімдеуінше, Перизат Қайрат қорды құру кезінде оның құрылтайшыларының орнына өзі қол қойған.
"Бұл деректі біз жедел-іздестіру шаралары арқылы өзіміз анықтадық. Кейін қылмыстық іс тіркеліп, тергеу басталды. Қоғамдық ұйымды құру кезінде құрылтайшылардың орнына өзі қол қойып, әуелден-ақ "инвесторларын" алдауды мақсат еткен, — деді ол Qoqam News бағдарламасында.
Еске салайық, 9 шілдеде таңертең Астана сотында Перизат Қайратқа қатысты алдын ала тыңдау өтті. Оған азаматтар мен ұйымдардан жиналған 3 миллиард теңгеден аса қаржыны жымқырды деген айып тағылған болатын. Айыпталушылар сот процесіне БАҚ өкілдерінің қатысуына қарсы болып, сот отырысын фото және видеоға түсіруге рұқсат бермеді.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
