Бүгін — Қазақстан Республикасы әскери медицинасының құрылған күні. Тәуелсіз еліміздің Қарулы күштері әскери медицинасы тарихы 1992 жылдан басталады. 33 жылда бұл сала жаңғыру мен жаңару кезеңінен өтті. Кәсіби мерекеде тілшіміз елордадағы бас госпиталға барып, саланың тынысымен танысып келді.
Еліміздің әскери медицинасы 8 госпиталь мен 4 лазареттен және өңірлік медициналық пункттерден тұратын үлкен жүйе. Өткен жылы 10 мыңнан аса пациент әскери емдеу мекемелерінде көмек алды. Саланың техникалық базасын жаңғырту мақсатында биыл 3 млрд көлемінде қаржы бөлінген.
Берік Ілиясов – ҚР қарулы күштері бас әскери медициналық басқармасы бастығының орынбасары:
Көптеген рентген диагностикалық аппараттар алынды. Ултрадыбыстық зерттеу аппараттары алынды. Сонымен қатар Алматы госпиталіне көптен күткен компьютерлік томограф сатып алдық. Осы шілде айынан бастап, әскери қызметшілерге қызмет етіп жатыр.
Биыл денсаулығын түзеп жатқандардың қатарында аға сержант Руслан Байсейітов те бар. Ол қызметтік міндетін атқара жүргенде, қан қысымы көтеріліп госпиталға жатқызылған.
Руслан Байсейітов – Аға сержант
Ауруханаға келген кезде қысымым 170/100 болған. Қазір түсті. Келген кезде анализдер алынды. Дәрігерлер қарады. Мынадай аппарат салып берді тексеріп отыру үшін. Сапасы жақсы.
КСМ: Былтыр бас әскери клиникалық госпиталдан 3964 адам емделіп шықты. Оның 3770 і әскери қызметкерлер болса, қалғаны өзге де ведомство өкілдері. Госпиталь дәрігерлерінің ішінде Голан жотасына барып, бітімгерлік миссиясын атқарып келген мамандар бар.
Бауыржан Бисембаев – Сержант
Менің миссиядағы қызметім – взвод құрамындағы атқыш-санитар қызметін атқардым. Бірде еуропа елінің әскеріне көмектесіп, өз базамызға сопровождениемен алып келдік. Қорқыныш болған жоқ. Бәріне үйреніп кеттік.
Әскери дәрігер қолына қару алмаса да, қарапайым жауынгердің өмірін сақтап қалатын жан. Сондықтан Қарулы күштер дәрігердің мәртебесі әскери қызметкерлер арасында әрдайым биік.
Дархан Рахымжан
