Биылғы «Славян базары» халықаралық фестивалінде Қазақстан атынан әнші Алмагүл Батталиева мен жас талант Мирас Нағашыбай бақ сынайды. Қос өнерпаз әлемдік беделді додаға қызу дайындалып жатыр.
Қазылар алқасының шешімімен 70 орындаушының ішінен оза шапқан Мирас халықаралық балалар музыкалық конкурсында алғаш рет өнер көрсетеді. 13 жастағы өнерпаз еліміздегі ғана емес, шетелдік конкурстарға да қатысып, ерекше дауысымен әлем жұртын таңғалдырып жүр. Мирас енді «Славян базары» сахнасында бағын сынайды. Ал Жетісу облысы филармониясының солисі Алмагүл Батталиева 8 жыл қатарынан ұлттық іріктеуге қатысып, биыл үздік шығып отыр.
Жеңімпаз халықаралық сахнада әншілік өнерімен қатар ұлттық нақыш пен заманауи стильді үйлестіріп, қазақ мәдениетін паш етпек. Қазақстанның намысын қорғайтын қос орындаушы да жүзден жүйрік шығып, жеңіспен оралатынына сенімді.
Мирас Нағашыбай, жас әнші:
«Славян базары» конкурсына екінің бірі бара бермейді. Осындай сахнаға шығу менің өнер жолымдағы үлкен белес деп ойлаймын. «Славян базары» конкурсынан ұтуға күшімді саламын. Болашақ жоспарым – әлемдік сахналарды бағындыру.
Қарлығаш Әбдікәрімова, «Славян базары» халықаралық фестивалінің ресми өкілі:
Қазақстанның барлық көк байрағын көтеретін осы екі әнші деп ойлаймын. Мен оларды кәдімгі Алмагүл кәсіби әнші болса, біздің Мирас та соған жақындап келе жатқан баланың біреуі. Бұл екеуі де мен үшін өте мықты.
Жазира Оразқызы
