Журналист Айбар Олжаев Facebook-парақшасында филология ғылымдарының докторы, профессор Кәкен Қамзиннің алаяқтарға алданып қалғанын айтты, — деп хабарлайды Massaget.kz тілшісі.
"Журналистиканың құрметті ұстазы, бәрімізді оқытқан ардагер Кәкен Қамзин ауыр жағдайға душар болды", — деп жазған Айбар Олжаев.
Оның айтуынша, алаяқтар ардагер журналист, профессордың сенгіштігін пайдаланып кинодағыдай әрекет еткен. Алдымен, "Энергосбыт" адамдары ретінде хабарласып, мекенжайы, ЖСН, пәтері туралы ақпаратты біліп алған. Кейін Ұлттық қауіпсіздік комитетінің атын жамылып хабарласып, біреулердің үйін тартып алайын деп тұрғанын айтып, тез үйін сатуға көндіріп, ал ақшаны Ұлттық банктің арнайы шотында сақтайсыз деп алдаған. Профессор нотариус арқылы үйін сатып, ақшаны алаяқтар жіберген курьерге бере салған.
Қазір Алматы Әуезов аудандық полиция департаментінде қылмыстық іс қозғалды.
"Алматы Полиция департаментінен осы резонансты іске барынша жұмылуды сұраймын. Ішкі істер министрі, құрметті Ержан Саденов, осы істі жеке бақылауға алсаңыз нұр үстіне нұр болар еді. Сот арқылы үйді сату мәмілесін заңсыз деп тану үшін адвокаттардың көмегі керек. Сыйлайтын ағамыз Абзал Құспан кәсіби кеңес берсе үлкен көмек болады. Парламент депутаттары, профессор шәкірттері Жанарбек Әшімжан, Нартай Сарсенғалиев, Мақсат Толықбай, арда журналист Ермұрат Бапи осы істі назарға алып, үлкен резонанс туғызса, профессорды қорғай аламыз", — деп жазды ол.
Журналистің айтуынша, дәл қазір Кәкен Қамзин жалғыз, үйінде баррикада құрып бекініп жатыр. Пәтерді сатып алғандар кешке, түнде келіп қоқан-лоққы көрсеткен.
Аптаның басты оқиғалары мен пайдалы видеоларды көру үшін YouTube арнамызға жазылыңыз
