Мына суретке назар аударсаңыздар. Kazatomprom алаяқтардан абай болуды ескертіп жатыр. Себебі әлеуметтік желілерде «Қазатомөнеркәсіп-тің» платформасына тіркелгендер табыс тауып жатқаны жайлы ақпарат көбейіп кеткен. Алайда бұл – жалған ақпарат. Алаяқтар жасанды интеллект арқылы алдаудың қандай түрлерін ойлап тапты?

Самал Қабышева, тілші:

Видеода Димаш Құдайберген. Дауысы да Димаш Құдайбергендікі. Бірақ бұл алаяқтардың айласы. Абай болыңыздар. Алаяқтар осылай танымал тұлғалардың бет-жүзін, дауысын барлығын айнытпай келтіріп, өз айласын іске асыруда. Kazatomprom ешқандайда платформаны әзірлеп, оған тіркелгендерге ақша бермейді. Мынандай батырманы баспаңыздар. Оны бассаңыздар, алаяқтардың құрбаны боласыздар.

Жасанды интеллектімен жасалған бұл видеоларды сіз де әлеуметтік желілерден көрген боларсыз. Бірақ мұның барлығы алаяқтардың істегені. «Қазатомөнеркәсіп» Акционерлік қоғамының басқарма төрағасы Мейіржан Юсупов бұл жаңалықтардың өздеріне тиесілі емес екенін мәлімдеп, абай болуға шақырды.

Мейіржан Юсупов, «Қазатомөнеркәсіп» ҰАК» АҚ басқарма төрағасы:

Алаяқтар әлеуметтік желілерде «Қазатомөнеркәсіп» басшылығының атынан сөйлеп, қаржылық жағдайды жақсартуға мүмкіндік беретін платформалар туралы бейнехабарлар таратуда. «Қазатомөнеркәсіп» ешқашан акцияларын сатып алуға үндеп, жарнама салмайды. «Қазатомөнеркәсіп-ке» қатысты сенімді мәліметтер компаниямыздың ресми сайттарында және әлеуметтік желілердегі ресми парақшаларда жарияланады.

Ал видеоның жасанды интеллектімен жасалғанын қалай ажыратуға болады? IT маманы мына жайттарға назар аударуға кеңес берді.

Алпамыс Батқалов, IT маманы:

Оригинал видеодағы басы қалай қозғалады, мимикасы қалай қозғалады, бірақ ар жағында айтып жатқан сөзі сәйкес келмейді. Дауысы монотонно шығады. Фейк дауыстар. Әлеуметтік желілерде шағымдану деген батырмасы бар ғой, соны басып, жалған ақпарат деп белгілеп отыру керек. Фактчекинг жасау керек.

Сондай-ақ әлеуметтік желі арқылы келген сілтемені таратпауға, оны баспауға кеңес береді. IT мамандарының өзі жалған ақпаратты ажырату қиындап бара жатқанын айтады. Себебі жасанды интелект жүйесі жылдам дамып жатыр. Сондықтан мамандар алаяқтардан сақтану үшін жалған ақпаратты бірден анықтайтын, оның басқа адамға таралуына жол бермейтін арнайы орталық құрылуы керек деп отыр.

Самал Қабышева