Қызылорда облысында суармалы су арналарын автоматтандыру жұмыстары басталды.

Биыл жалпы ұзындығы 150 шақырымға жуықтайтын 5 гидронысанға қашықтан бақылау құрылғысы орнатылады. Мамандардың айтуынша, бұл жүйе су шығынын азайтып, мониторинг жасауға мүмкіндік береді.

Жалағаш ауданындағы Темірбек Жүргенов ауылында үш жылдан бері электронды су өлшеу құрылғысы қолданылып келеді. Диқандар жаңа технологияның көмегімен су арнасын қашықтан басқарып отыр. Сушылар бұрынғыдай қолына сызғыш алып, тоспа басында телмірмейді. Су ағынынан бастап, деңгейі мен көлемін де смартфон арқылы анықтайды.

Әліби Бекжанов, шаруа қожалығының басшысы:

- Бір гектарға 28 мың куб су жұмсадым мен бірінші жылы. Өткен жылы 10 сантиметр тереңдікте ұсатап, күріштің суын, 18 мың куб су жұмсадым бір гектарға. Осы жылы 5 см-ге рейканы қойдым, 5 сантиметрден суды асырмай көреміз деп. Одан да төмен болады деп мен түсініп тұрмын. Солай болатынына көзім жетіп тұр.

Осындай құрылғыларды өңірдегі магистралды су арналарына да орнату жұмыстары басталды. Бүгінде Жаңақорған, Шиелі және Сырдария аудандарындағы 5 каналдың гидроқондырғысы автоматтандырылып жатыр. Қазір құрылыс жұмыстарының 10 пайызы аяқталған. Қалған бөлігі егін суару маусымынан кейін жалғасады,-дейді мамандар.

Елдос Ақышев, "Қазсушар" РМК филиалы директорының орынбасары:

- Сағадан қанша су өткені, каналдың табаны, ұлтаны барлығы бойынша қанша су өтіп жатқаны, қанша секунтына, соның барлығын есептеп, автоматты түрде шығарып береді бізге. Оның біздің іште, осы облыста болады, сосын орталық аппарат дейміз ғой, Астанада «Казводхоз» соған жолданатын болады. База бір бәрімізде.

Қазіргі таңда, өңірде тағы 15 су арнасын автоматтандыру үшін жобалы-сметалық құжат дайындалып жатыр.

Айбек Уәли, "Қазсушар" РМК филиалының бөлім басшысы:

- Су арналарын автоматтандыру және цифрландыру су шығынын бақылауға толық мүмкіндік береді. Сондай-ақ су ресурстарына мониторинг жүргізуге жол ашады. Жобаға енген 15 су арнасының әрқайсысы толық зерттелді. Бұл жүйе арқылы суды бақылау оңай әрі тиімді болмақ.

Өңірде магистральды су арналарының жалпы ұзындығы 2 мың 300 шақырымнан асады. Жыл сайын аймақта 60 шақырымға жуық су арнасы тазаланады.

Нұрлан Жақыпбеков, Нұржан Мұзарапшин, Айтмұхамбет Байділдаев