Қазақстан мен Моңғолия арасындағы сауда айналымы 4 есе артады .
Бұл туралы Сыртқы істер министрінің Ұланбатырға жасаған ресми сапары аясында айтылды. Мұрат Нұртілеу Моңғолия сыртқы қатынастар министрінің шақыртуымен Ұланбатырға барып, екі ел арасындағы қарым-қатынастың қай бағытта өрбитіні жөнінде мәлімдеме жасады.
Әлішер Әли, тілші:
- Былтыр Қазақстан мен Моңғолия арасындағы сауда айналымы 124 млн долларды құрады. Бұл өткен жылмен салыстырғанда 11 млн долларға артық. Бұл туралы Мұрат Нұртілеудің Ұланбатырға жасаған ресми сапары аясында айтылды. Бүгінгі жиында екі елдің сыртқы саяси ведомство басшылары келісөздер жүргізіп, сауда-экономикалық ынтымақтастықты одан әрі дамытуға ерекше көңіл бөлді.
Мұрат Нұртілеу, ҚР Премьер-министрінің орынбасары – Сыртқы істер министрі:
- Әрине, бұл біздің мүмкіндіктерімізге сай емес. Сондықтан Мемлекет басшыларының тапсырмасына сәйкес екіжақты сауданы 500 миллионға жеткізу жөнінде уағдаластықты нақты істер арқылы жүзеге асыру бағытында өзара қоян-қолтық жұмыс істеуге келістік. Қазақстан Моңғолия үшін Орталық Азия және әрі қарай Еуропаға апаратын стратегиялық қақпа бола алады, ал Моңғолия Қазақстан үшін Солтүстік-Шығыс Азия нарықтарына шығудың баламалы бағыты болып саналады. Бұл тұрғыда моңғолиялық серіктестерімізді көрші елдермен бірлесе, Транскаспий бағытының Солтүстік, Оңтүстік дәліздерін пайдалануға шақырамыз.
Енді Қазақстанның ветеринарлық вакциналары Моңғолияда өндіріледі. Екі елдің министрлері ауылшаруашылық саласында, оның ішінде қазақстандық ветеринарлық вакциналарды Моңғолияға экспорттауға, кейін оның өндірісін осы елде ашуға сөз байласты. Оған қоса, Мұрат Нұртілеу Қазақстанда өндірілетін ауыл шаруашылығы техникасын Моңғолияға жеткізуге дайын екенін айтты. Еліміз пилоттық жоба ретінде Моңғолиядан 500 мың бас ешкі сатып алуға қызығушылық танытатынын мәлімдеді. Сондай-ақ Қазақстан Моңғолиямен «Электронды үкімет» тәжірибесін бөлісуге дайын.
Мұрат Нұртілеу, ҚР Премьер-министрінің орынбасары – Сыртқы істер министрі:
- Біз қауіпсіздік және қорғаныс саласындағы ынтымақтастық әлеуетін де қарастырдық. Қазақстанда еуропалық стандарттарға сай құрастырылатын заманауи әскери техниканы Моңғолияға жеткізуге дайынбыз. Сонымен бірге еліміздің «Электронды үкімет» платформаларын енгізу және ғарышты игеру саласында мамандарды даярлауға әзірлігімізді әріптесіме айттым.
Моңғолиядағы қазақтар – екі ел арасындағы берік достықтың алтын көпірі. Осылай деген Сыртқы істер министрі Моңғолиядағы қазақ диаспорасының өкілдерімен кездесіп, 5 мың дана көркем әдеби кітап табыстады.
Әлішер Әли, тілші:
- Бүгінде Моңғолияда халық саны 3,5 миллионнан асады, онда 28 ұлт, ұлыс және этностық топ бар. Қазақтар ел халқының 4%-ін құрайды.
Авторы: Әлішер Әли
