Таяу Шығыста ахуал күрделенген соң, 300-ден астам қазақстандық турист Дубайдан Алматыға арнайы рейстермен жеткізілді, деп хабарлайды Skifnews.kz ақпарат порталы.
FlyDubai әуе компаниясының екі ұшағы 15 маусымда түнгі сағат 02:45 пен 06:19-да Алматы халықаралық әуежайына қонды. Бортта барлығы 332 жолаушы болған. Олардың арасында 13 маусымда ұшуы тиіс болған, бірақ рейсі шегерілген азаматтар да бар.
Белгілі болғандай, аймақта жағдайдың бірден шиеленісуіне байланысты бірнеше халықаралық тасымалдаушы Дубай мен Абу-Дабиден қатынайтын рейстерді уақытша тоқтатуға мәжбүр болды.
ҚР Көлік министрлігіне қарасты Азаматтық авиация комитеті 13 маусымнан бастап Иран, Израиль, Сирия, Ирак, Иордания және Ливан аумағында және олардың әуе кеңістігінде ұшуға тыйым салғанын хабарлады.
FlyDubai рейстері қауіпсіз бағытпен ұшып, тек кідірген жолаушыларды ғана емес, жоспарлы түрде ұшуға тиіс азаматтарды да Қазақстанға дін аман жеткізді.
