Мұндағы мақсат – қауіпсіздікті қамтамасыз ету. Іс-шара кезінде мылтықты сақтайтын орын, жеке сәйкестендіру номері және құжаты тексеріледі.

Қалалық полиция департаментінің мәліметінше Алматыда 42 мыңға жуық адамның қару ұстауға рұқсаты бар.

Аршын Кемелжан, тілші:

- Алматыда саятшының саны көп-ақ екен. Қазақ жерінде адамдар аңшылықпен ежелгі палеолит дәуірінен айналысқаны тарихтан белгілі. Бұрын бұл күнкөрістің қамы болса, қазір хоббиге айналды. Бүгінде 42 мыңға жуық алматылықтың қару ұстауға рұқсаты бар. Олардың қолында 56 мыңнан аса мылтық жүр. Таир Фазлиев алғашқы қаруын 40 жыл бұрын сатып алыпты.

Таир Фазлиев, қала тұрғыны:

- Қару иелену деген үлкен жауапкершілікті талап етеді. Өйткені бұл ойыншық емес, өте қауіпті құрал. Ең бастысы, дұрыс сақтау керек. Салғырттық танытпаған жөн. Дабыл жүйесі бар сейфте тұру керек. Оның қалай ашылатынын өзіңнен басқа тірі жан білмеуі тиіс. Ал оқтары басқа жерде сақталады.

Тұрғындар әр 5 жыл сайын қаруды қайта тіркеп, тиісті анықтамаларды жаңартып отыруы керек. Биыл осындай талапты орындамаған мың адам әкімшілік жауапкершілікке тартылған. Аңшы Артур Дәулетияровтың 3 мылтығы бар екен. Оларды талапқа сай сақтап отырғанын сақшыларға көрсетіп, рұқсат құжаттарын тексертті.

Артур Дәулетияров, қала тұрғыны:

- Мен аңшылықты жақсы көремін. Сол үшін 7 жыл бұрын алғашқы мылтығымды сатып алдым. Достарыммен бірге жылына бірнеше рет арнайы орындарда аң атып тұрамыз.

Алматылықтардың қолында негізінен тегіс және ойық ұңғылы мылтықтар жүр. Газ және пневматикалық тапшанша ұстайтындары да бар. Заң бойынша әр адамға 6 қарудан артық сатылмайды.

Бейбіт Жексенбиев, қалалық ПД Азаматтық және қызметтік қару айналымын бақылау бөлімінің бастығы:

- Қару иелерін жылына бір рет тексереміз, одан бөлек, іс-шара кезінде де қару иелері тексеріледі. Осы жылдың басынан бері Алматы қаласы бойынша 20 мыңнан астам қару иелері тексерілді. Тексеру барысында олардың қаруларының номер сәйкестігі, рұқсатнамасының уақытының келгені тексеріледі.

Полиция қызметкерлері заңды қару-жарақты ғана тексеріп қоймайды. Тәртіп сақшылары құжаты жоқ мылтықтарды да іздестіріп, тәркілеп отырады. Олар полиция департаментінің арнайы қоймасына қойылып, қылмысқа қатысы бар-жоғын анықтау үшін сараптама жасалады.

Авторлары: Аршын Кемелжан, Мұхит Құдықбаев