Елімізде ауыл шаруашылығы алқаптарында үйірлі шегірткелерге қарсы химиялық өңдеу жұмыстары жалғасып жатыр.
Бүгінге дейін жоспарланған көлемнің 80,1 пайызы, яғни 1,7 млн гектар жер өңделді, деп жазады inbusiness.kz сайты.
– Түркістан облысында жұмыстар іс жүзінде аяқталды – 371 мың гектардан астам алқап өңделді. Жамбыл облысында 81,3 мың гектар жерге химиялық өңдеу жүргізілді. Еліміздің тағы 13 өңірінде өңдеу жұмыстары жалғасып жатыр. Ақтөбе облысында – 351 мың га, Қостанай облысында – 345,7 мың га, Батыс Қазақстан облысында – 177,5 мың га, Қызылорда облысында – 58,6 мың га, Қарағанды облысында – 34,2 мың га көлемінде күрес шаралары жүзеге асырылды, – делінген Ауыл шаруашылығы министрлігі таратқан ақпаратта.
Аталған шараларға жалпы 443 бірлік арнайы бүрку техникасы тартылған, оның ішінде 24 ұшақ, 49 ұшқышсыз ұшу аппараты және 30-дан астам аса жеңіл авиация техникасы бар.
– Сонымен қатар, әлеуметтік желілерде Атырау, Батыс Қазақстан және Қостанай облыстарында шегірткенің жаппай қаптауы туралы бейнематериалдар тарауда. Әрбір жарияланым бойынша жан-жақты тексеру жүргізілуде. Мұндай материалдардың көпшілігі фактілермен расталмайтыны және шынайы жағдайды көрсетпейтіні анықталды.
Бүгінгі күні аталған өңірлердің барлығында химиялық күрес жұмыстары жоспарға сай жүргізілуде, ауыл шаруашылығы дақылдарының зақымдану деректері тіркелген жоқ, – делінген ақпаратта.
Ал, бүгін министр Айдарбек Сапаров Қостанай облысында шегірткеге қарсы жүргізіліп жатқан күрес шараларымен танысты.
2025 жылға арналған фитосанитариялық болжамға сәйкес, Қазақстанда үйірлі шегірткенің таралуы шамамен 2,1 млн гектар аумақты қамтиды деп күтілуде. Елдің 15 облысында 1,7 млн гектарға химиялық өңдеу жүргізілді.
