40 жылдан астам ғұмырын бала тәрбиесіне арнаған. Түркістан облысының Қазығұрт ауданында тұратын Жақсыбай Құлжабайұлы қазір сексеннің сеңгіріне шықса да ұстаздықтан қол үзген емес. «Отбасында немере-шөбереге тәлім беріп, тәрбие үйрету — өмірлік ұстанымым»,- дейді қария.
Жақсыбай Құлжабайұлы немерелерімен бір сәт шахмат ойнауды әдетке айналдырған. Бүгін де үш жастағы немересі Мөлдірге тақта тастың ережелері мен фигуралардың жүрісінің қыр-сырын үйретуде. Қарияның сөзінше шахмат баланың ойлау қабілетін дамытып, нақты шешім қабылдауға үйретеді. Әрі баланың сабырлы әрі қағылез боп өсуіне ықпалы орасан.
Жақсыбай Құлжабайұлы, Қазығұрт ауданының тұрғыны:
Шахмат өнердің бір түрі, тәрбиенің бір түрі. Шахматты үйренген баланың қай саланы болса да тез меңгеруге, игеруге қабілеттері жетіп жатады. Сондықтан шахматты жас кезінен бастап үйренген дұрыс болады.
Ұстаздық еткен жан өз балаларынан жұрттың баласын бөліп жара алмайды дейді Жақсыбай ақсақалдың зайыбы Қадиша Қожахметқызы. Ол да жылдар бойы саналы ғұмырын бала тәрбиесіне арнаған. Қазір ұлағатты әке мен өнегелі ананың өмір жолын балалары жалғап, ұстаз болып қызмет етуде. Бірақ ардагер ұстаздар әлі күнге дейін білгенін балаға үйретуден жалыққан емес.
Хадиша Қожахметқызы, Қазығұрт ауданының тұрғыны:
Қазір енді мен зейнеткермін ғой. Зейнеткер болсам да балаларым сабақтан келгеннен кейін кейбір кезде өздері сұрайды. Соны айтып беремін. Түсіндіріп беремін. Солай балаларым жақсы оқиды бәрі. Келіндерімнің барлығы жақсы, тәрбиелі. Өйткені олар өздері ұстаз.
Жазира Жандарова, келіні:
Ата-енемнен көп тәлім-тәрбие алып, сол тәлім-тәрбиемізді қазіргі таңда өзіміздің перзенттерімізге беріп келе жатырмыз. Осы қарашаңыраққа келіп, үлгі өнеге алып, атасы мен апасының тәрбиесінде болады.
Бес баладан тараған немере шөбере демалыс күндері қара шаңырақта бас қосады. Қос қарияның берген тәлім-тәрбиесін санаға сіңірген ұрпақ үшін бұл бұлжымас қағидаға айналған.
Айнұр Ақбаева
