Елордада Қазақстан-Қырғызстан парламентаралық ынтымақтастық кеңесінің үшінші отырысы өтті, деп хабарлайды 24KZ. Жиынға Мәжіліс төрағасы Ерлан Қошанов пен Қырғыз Республикасы Жогорку Кенешінің төрағасы Нурланбек Тургунбек уулу қатысты.
Мәжіліс спикері екі елдің президенттері ықпалдастықтың басым бағыттарын айқындап, оларды жүзеге асыру үшін нақты міндеттер жүктегенін атап өтті. Соның бірі – 2030 жылға қарай екіжақты тауар айналымын 3 млрд АҚШ долларына жеткізу. Ерлан Қошанов оған Мәжіліс осыдан екі апта бұрын ратификациялаған Қазақстан мен Қырғызстан арасындағы одақтастық қатынастарды тереңдету туралы шарт көмектесетініне сенім білдірді. Маңызды құжат парламентаралық байланысты нығайтудың жаңа мүмкіндіктерін ашады. Өз кезегінде Жогорку Кенеш төрағасы парламентаралық ынтымақтастық кеңесінің рөлін жоғары бағалады. Кеңес отырысы барысында сауда-экономикалық және логистика салаларындағы әріптестікті нығайту мәселелері қаралды. Индустриялық сауда-логистикалық кешен құрылысы, бақылау-өткізу пункттерін жақсарту, Алматы-Ыстықкөл автожолын салу мәселелері қамтылды.
Ерлан Қошанов, ҚР Парламенті Мәжілісінің төрағасы:
- Көшбасшыларымыздың екіжақты кездесулерінің қарқындылығы парламентаралық байланыстардың жиілігіне де тікелей әсер етеді. Біздің ендігі мақсатымыз – осы екпінді сақтап, қарқынды одан әрі нығайту. Бүгінгі кеңес отырысы да осыған арналып отыр. Екі елдің парламенттеріне жоғары деңгейде уағдаластықтардың іске асырылуын қадағалау функциясы жүктелген. Осы ретте екі ел үкіметі белсенді жұмыс істеп жатқанын да атап өткен жөн.
