«AMANAT» партиясы қазақ әдебиетіндегі ең көп оқылатын әрі халықтың сүйікті 100 кітабын анықтауға бағытталған жалпыхалықтық сауалнамаға белсенді қолдау білдіруде. Осыған орай елордада жазушылар, қоғам қайраткерлері, оқырмандар мен партия өкілдерінің қатысуымен арнайы кездесу өтіп, жобаның аралық қорытындылары жария етілді.
Ұйымдастырушылардың мәліметінше, сауалнамаға осы күнге дейін 16 мыңнан астам қазақстандық қатысқан. Дауыс беру 23 шілдеге дейін жалғасады. Ал қорытынды тізім 10 тамыз – Абай күніне орай жарияланады.
Жоба биылғы 23 сәуірде – Қазақстанда алғаш рет аталып өткен Ұлттық кітап күні аясында бастау алған. Бұл күн Мемлекет басшысы Қасым-Жомарт Тоқаевтың бастамасымен бекітілген болатын. Президент өз сөздерінде қоғамда кітап оқу мәдениетін дамыту қажеттілігін бірнеше мәрте ерекше атап өткен.
Кездесу барысында Мәжіліс депутаты, «AMANAT» партиясы фракциясының мүшесі, Ұлттық құрылтайдың қатысушысы Айдос Сарым бастама елдегі кітап индустриясы мен әдебиетке деген қызығушылықты жандандыруда маңызды рөл атқаратынын айтты.
Бұл тек әдеби талғам қалыптастыру құралы ғана емес, сонымен қатар кітап нарығы үшін бағыт-бағдар болатын көрсеткіш. Егер нәтижесінде ел бойынша жиі оқылатын, сүйікті туындылар айқындалса, оларды қайта басып шығару, насихаттау жұмыстары артады. Бұл – қоғамның рухани айнасы іспетті. Сонымен қатар, сауалнама жастар мен аға буынның әдеби талғамын, өңірлік ерекшеліктерін саралауға мүмкіндік береді, – деді депутат.
Сауалнама нәтижесі баспагерлер мен авторлар үшін де бағдар болмақ – қандай жанрларға сұраныс жоғары екенін анықтауға жол ашады. Жоба аясында мәдени шаралар мен зерттеу жұмыстары да жүргізіліп жатыр.
Сонымен қатар, ұйымдастырушылар дауыс берушілерге арнап ынталандыру мақсатында сыйлықтар да үлестіріп жатыр. «Меломан-MARWIN» дүкендер желісінің қолдауымен 9000-шы, 10000-шы және 16000-шы болып дауыс берген азаматтарға сыйлық карталары табысталды. Олар – астаналық Жүсіп Амантай, қарағандылық Әсел Көшен және ақтөбелік Гүлжан Өтегенова.
Айта кету керек, «AMANAT» партиясы соңғы жылдары кітап оқу мәдениетін насихаттауға ерекше мән беріп келеді. 2023 жылдың қыркүйегінен бастап партияның «Кітап–AMANAT» жобасы аясында еліміздің түкпір-түкпірінде, әсіресе шалғай ауылдар мен шағын қалаларда 23 кітап орталығы ашылды. Бұл орталықтарда әдеби кештер, авторлармен кездесулер, оқырман байқаулары ұйымдастырылып келеді. Жалпы саны 700-ден астам шара өткен. Кітаптар нарықтағы бағадан төмен ұсынылады. Бұл орталықтар – бүгінде мәдени-ағартушылық және қоғамдық пікірталас алаңына айналып отыр.
Әрбір қазақстандық eGov Mobile қосымшасы арқылы дауыс бере алады. Ол үшін бір немесе он кітапқа дейін таңдап, туындының атауы мен авторын көрсету жеткілікті.
