Қарағанды қаласының 12 жастағы тұрғыны экология тақырыбына арналған ертегілер сериясын шығарды. Бүгін бұл жинақ елордада таныстырылды, деп хабарлайды Egemen.kz.
Автор Платон Нечаевтың айтуынша, оның кейіпкерлері табиғатты ұқыпты пайдалануды үйретеді. Кітап сатылымынан түскен қаражаттың бір бөлігі ағаш отырғызуға бағытталады. Жас жазушының бастамасын Сенат та қолдап отыр.
– Менің кітаптарым экология немесе спорт тақырыбымен байланысты. Бұл жинақта барлық шығармалар мен экологиялық тапсырмалар қамтылған. Мен Қарағандыданмын, ал Қарағанды – өте лас қала. Сондықтан біз ағаш отырғызуды қолға алдық. Бұл идеяға мені анам бағыттады. Қарағандыда 200 ағаш, Қазақстан бойынша 1300 ағаш отырғыздық, – дейді Платон Нечаев.
Парламент Сенаты төрағасының кеңесшісі Динара Сәдуақасованың сөзінше, бұл жоба Сенаттың қолдауымен жүзеге асты.
– Бізде тұрақты даму мақсаттарын енгізуге арналған акселератор бар, сол алаңда Платон өз идеясын ұсынып, жобасын дамытты. Олар Бурабайдағы Бөлектау баурайында экосоқпақ та әзірледі. Экосоқпақпен жүріп өткенде Платонның кітаптарындағы кейіпкерлермен кезігуге болады. Жас ұрпақтың экологияға мән беруі – өте қуанышты жағдай, – дейді ол.
