Бұл туралы Үкіметтің баспасөз қызметі хабарлады.
Үкімет маңызы аз шығындарды қысқарту және бюджетті оңтайландыру жұмыстарын жалғастырып жатыр. Бұл туралы Премьер-министр Олжас Бектенов айтты, деп хабарлайды inbusiness.kz сайты.
Атқарушы билік бюджет шығындарын қысқарту бағытында жұмыс жүргізіп жатыр.
"Мысалы, 2025 жылдың бюджеті қалыптастырылған кезде бюджеттік бағдарламалар әкімшілерінің маңызсыз шығындарға қатысты өтінімдері алынып тасталды. Жалпы 34 трлн теңгеге өтінім келіп түсті, соның ішінде біз тек 25 трлн 700 млрд теңгесін ғана қанағаттандырдық", – деді Олжас Бектенов AMANAT партиясы фракциясының кеңейтілген отырысында.
Оның айтуынша, Үкіметте шығындарды оңтайландыру жұмысы тұрақты негізде жүргізіліп келеді.
"Әрине, мемлекеттік органдардың ағымдағы шығындары үнемі қайта қаралып отырады. Біз экономикалық тиімсіз шығындарды қысқартамыз", – деді Үкімет басшысы.
Олжас Бектенов тарифтік реформаны жалғастыру және энергетика мен коммуналдық секторларда Ұлттық жобаны жүзеге асыру бағытындағы жұмыс 2023 жылы басталғанын айтты. Бұл жұмыстар 2024 жылы жалғасын тапты және биыл да жүргізіліп жатыр.
"Екі жарым жыл ішінде инженерлік инфрақұрылымды, жылу көздерін, түрлі желілерді жаңғыртуға 600 млрд теңгеден астам инвестиция тартылды. Соның нәтижесінде тозу деңгейі 6,2%-ға төмендеді. Қиындықтарға қарамастан, біз бұл жұмысты жалғастыруға ниеттіміз, өйткені қазіргі заманға сай жаңғыртылған тұрғын үй-коммуналдық шаруашылық жүйесін қалыптастырғымыз келеді", – деді Премьер-министр.
Оның сөзінше, "Тарифті инвестицияға айырбастау" бағдарламасын 2029 жылға дейін жалғастыруды көздейді. Ұлттық жоба аясында қабылданып жатқан шаралардың арқасында Үкімет тозу деңгейін 40%-ға дейін төмендетуді жоспарлап отыр.
