Жаз басталғалы теріскей тұрғындарын шыбын-шіркей әбігерге салды. Биыл Солтүстік Қазақстан облысында маса әдеттегіден көбейіп кеткен. Салдарынан ауыл тұрғындары далада мал жайып , сиыр сауу қиындады, дейді.
Алияр Жұпархан 16 жылдан бері Қызылжар ауданындағы Бәйтерек ауылының малын бағады. Елді мекен тұрғыны биылғыдай масаны бірінші рет көріп тұрғанын айтады. Күн тымық болса, қансорғыш тіптен көбейіп, малдан маза қашады.
Әлияр Жұпархан, малшы:
Бүгін салқын түсіп, пәс болып тұр. Әйтпесе күнде малды тоқтатпайды. Желдеп мал жайылып тоқтамайды. Қазір әзірге жүдей берген жоқ. Масаның нақты көбейетін кездері әлі алда. Сол кезде қиындайды. Жан-жақта жер тар. Сол үшін биыл маса қинап тұр.
Ауылдық жерлерде масаға қарсы өңдеу жұмыстары жүргізілмейді. Тұрғындандар арнайы препараттарды өздері сатып алатынын айтады.
Ал облыс орталығында дезинсекцияға 20 млн теңге бөлінді. Негізінен адам көп жүретін саябақтар мен қаланың шеткі аудандары қамтылады. Мамандардың айтуынша, су тасқынының да әсері бар. Шыбын-шіркей ылғал көп болған жерде тез өседі.
Бердімұрат Баймұқан, Петропавл қалалық әкімдігі түкш бөлімінің баспасөз хатшысы:
Бүгінге дейін 600 гектардан астам аумақ өңделді. Өңдеу жұмыстары түнгі уақытта адамдар қозғалысы аз кезде жүргізіледі. Дезинсекциялық жұмыстар сантитарлық эпидемиологиялық қызмет ұсынған препараттар арқылы жүзеге асырылып жатыр.
Биыл теріскейде жаздың басы жаңбырлы болды. Қалалық әкімдік өкілдерінің айтуынша, ауа райының қолайсыздығы залалсыздандыру жұмыстарына кедергі келтіріп тұр. Қыркүйек айына дейін 2 мың гектар жерде зиянкестерге қарсы препараттар егілуі тиіс.
Эльмира Кәленова
