Қарағандыда әлеуметтік және экологиялық шараларға белсенді қатысқан еріктілер облыс әкімінің алғысхатымен марапатталды. Бұған қоса техникалық колледждерде жұмысшы мамандықтары бойынша үздік оқып және түрлі жобаларымен көзге түскен студенттерге ақшалай сыйлық табысталды. Марапаттау рәсімі Мемлекеттік рәміздер күні мерекесіне орай ұйымдастырылған салтанатты шара аясында өтті.
Қарағанды қаласындағы бас тудың маңына жиналған 3 мың адам әнұранды шырқады. Салтанатты шараға кадеттер, студенттер, еріктілер, еңбек ардагерлері, қоғам белсенділері мен өнер ұжымдар қатысты.
Ермағанбет Бөлекпаев, Қарағанды облысының әкімі:
- Әділетті Қазақстан Елтаңбасымен еңселі, әнұранымен асқақ, көк туымен тұғырлы. Тәуелсіздігіміз баянды, бірлігіміз бекем болсын! Тұрақтылықты тұғыр етіп, жігерін намысқа жаныған халқы бар еліміздің ертеңі жарқын болғай!
Мерекелік шара барысында әлеуметтік және экологиялық акцияларға белсенді қатысқан еріктілер облыс әкімінің алғысхатымен марапатталды. Сондай-ақ колледждерде жұмысшы мамандықтары бойынша үздік оқып және ерекше жобаларымен көзге түскен студенттерге ақшалай сыйлықтар табысталды. Рәзия Әбдуәли Қарағанды тамақтандыру және сервис колледжінің 2 курсында оқиды. Ол биыл Қазақстанның үздік 100 студенті арасында алғашқы ондыққа кірген.
Рәзия Әбдуәли, Қарағанды тамақтандыру және сервис колледжінің студенті:
- Мен үшін үздіктердің қатарына кіріп, облыс әкімінің марапатын алу –үлкен мәртебе. Болашақта осы жолдан таймай, ары қарай жалғастырамын деген ойдамын. Мен Қарағанды тамақтандыру және сервис колледжіне оқуға түстім. Оқумен бірлестіріп отырып, колледжде ашылған студенттік наубайханамызда жұмыс жасаймын.
Бұл күні 30 мектеп оқушысы «Жас ұлан» балалар мен жасөспірімдер ұйымына қабылданды. Мерекелік шара соңы үлкен туды желбіреткен жастар флешмобымен түйінделді.
Авторлары: Руслан Нұрланұлы, Сайран Ақамбаев, Аман Хамит
