Тараз-Шымкент жолында рұқсатсыз қозғалған ірі габаритті жүк көлігінің салдарынан жол-көлік оқиғасы орын алып, қозғалысқа шектеу қойылды, деп хабарлайды " ҚазАвтожол ".
"2025 жылғы 4 маусымда Түркістан облысы Түлкібас ауданы Келтемашат елдімекенінің маңында Тараз-Шымкент бағыты бойынша I-б санатты ақылы автожолдың 653-ші шақырымында Shacman маркалы ірі габаритті жүк көлігінің (ұзындығы – 43,8 м, ені – 5,2 м, биіктігі — 5,2 м, салмағы — 124,8 т) қатысуымен жол-көлік оқиғасы болды.
Жүк көлігі Тараз — Шымкент бағытында "РФ шекарасы (Жайсан ө\п) – Мәртөк – Ақтөбе (солтүстік айналма жолымен) – Қарабұтақ – Қызылорда –Шымкент (солтүстік айналма жолымен) – Тараз (айналма жолымен) – Қордай – Алматы – Қорғас – ҚХР шекарасы (Нұр Жолы ө/п)" автожолында келе жатқан", — делінген хабарламада.
Сонымен бірге Машат асуында көлік құралының тежегіш жүйесі істен шығып, салдарынан жүргізуші көлік тізгініне ие бола алмағаны мәлім болды. Жүк көлігі екі бағыттағы жолды жауып, 220 метр қоршауға зақым келтірді. Зардап шеккендер жоқ.
"Қазіргі уақытта қозғалыс бір жолақпен ұйымдастырылып жатыр. Жол қозғалысын толық қалпына келтіру жұмыстары жүргізіліп жатыр. Жол жамылғысы құрғақ, жол белгілері орналасу тәртібіне сәйкес орнатылған. "ҚазАвтоЖол" ҰК" АҚ Түркістан облыстық филиалы бұл көлік құралының қозғалысына рұқсат бермеген, себебі оның өлшемдері белгіленген нормативтерге сәйкес емес (ені — 5,2 м, биіктігі — 5,2 м)", — деп жазды "ҚазАвтожол" баспасөз қызметі.
Осы жайтқа байланысты 2025 жылғы 4 маусым сағат 18:30-да Түркістан облысында "РФ шекарасы (Жайсан ө\п) – Мәртөк – Ақтөбе (солтүстік айналма жолымен) – Қарабұтақ – Қызылорда –Шымкент (солтүстік айналма жолымен) – Тараз (айналма жолымен) – Қордай – Алматы – Қорғас – ҚХР шекарасы (Нұр Жолы ө/п)" автожолының 653-ші шақырымында жол-көлік оқиғасының орын алуына байланысты, осы жолдың 593-674 шақырымында және Жамбыл облысы бойынша 534-593 шақырым аралығында жүк көліктерінің қозғалысына шектеу қойылады.
Жүк көліктері үшін жолды 2025 жылғы 5 маусым сағат 05:00-де ашу жоспарланған.
