Бүгін Алматы облысы Жамбыл ауданы Ұзынқарғалы өзенінің аумағы тазаланды. «Таза жағажай – таза өзен» акциясы аясында өткізілген экологиялық шараға 100-ден аса адам қатысты. Мақсат – су жағалауын тұрмыстық қалдықтардан арылту және қоршаған ортаны қорғау мәселесіне қоғам назарын аудару. Шараға қатысқандар өзен маңын пластикалық ыдыстардан, қағаз өнімдерінен және өзге де қоқыс түрлерінен тазартты. 3 тоннадан астам қоқыс жиналып, арнайы орындарға жеткізілді.
Қуаныш Батырбаев, Қарғалы ауылдық округы әкімінің орынбасары:
Ұзынқарғалы өзенінің бойы – 6 шақырым. Өзімізбен бірге қолғап, қаптарымызды, керекті құрал-саймандарымызды алып алдық. Өзіміздің қоқыс тастайтын алаңымыз бар. Ұзынағаш ауылына тасиды.
Экологиялық мәдениетті мектеп қабырғасынан үйрету маңызды
Бүгін Алматыда «Таза Қазақстан» экоакциясы барысында макулатураны қайта өңдеумен айналысатын зауыттың жұмысы таныстырылды. Кәсіпорын жылына 60 мың тонна қағаз қалдығын өндірістік айналымға енгізеді. Мұнда 900-ге жуық маман еңбек етіп жүр. Зауыт өндірісте қолданылған суды өңдеп, қайта пайдаланатын жүйе енгізген. Мамандардың айтуынша, мұндай су жүйесі табиғатқа келетін зиянды азайтып, экологиялық қауіпсіздікті арттырады.
Талғат Әжібеков, «KZ Recycling» ЖШС бас директорының орынбасары:
Қағаз қалдықтарын бүкіл Қазақстан бойынша облыс орталықтарынан жинаймыз. Қайта өмір берген қағаздардан гофрокартон, кондитерлік өнімдерді қаптайтын жәшіктерді жасаймыз. Мектептің оқушыларынан бастап, үйрету керек. Қағаз қалдығын бөлек жинап, пластиктың қалдығын бөлек жинағанды, сонда ғана қағаз жинау процентін өсіре аламыз.
Жазира Оразқызы
