Жамбыл облысында шегірткеге қарсы химиялық өңдеу жұмыстары 60 процентке аяқталды.
Жалпы биыл облыста 107 мың гектар алқапты үйірлі шегірткеден тазарту үшін жергілікті жерлерде арнайы штаб құрылды. Бір жарым айдан бері фитосанитарлар даланы аралап үйірлі шегірткенің таралу аумағын анықтауда.
Жамбыл облысының аумағында үйірлі шегірткенің марокколық, итальян прусы және азиялық түрі тараған. Өңірде зиянкестерге қарсы күрес сәуір айының ортасында басталды. Аудан-ауылдарда шегірткеге қарсы арнайы штаб та құрылды. Марокколық шегірткеге қарсы химиялық өңдеу жұмыстары аяқталып, итальян прусына қарсы жұмыстар жалғасып жатыр.
Қайрат Көшенов, облыстық ауыл шаруашылығы басқармасының басшысы:
- 36 бірлік техника жұмылдырылған. Оның ішінде екі ұшағымыз бар. 3 дрон бар. Қалғаны автомашиналар. Толықтай техникамен қамтылған толықтай препаратпен қамтылған. Адам саны жеткілікті. Сол себепті бақылауда тұрған сұрақ. Сондықтан қауіп жоқ деп есептейміз.
Өңірде химиялық өңдеу жұмысы жоспарға сай жүріп жатыр. Мамандардың сөзінше, биыл шегірткеге қарсы күреске 8 тоннадан аса дәрілік химикат пайдаланылады. Фитосанитарлармен қоса әкімдіктің 360 қызметкері шегірткеге қарсы күреске жұмылды. Олар шегірткенің таралу аумағын анықтауға көмектеседі.
Қыдырәлі Шымырбаев, шаруа:
- Өзіміздің әкімшіліктен де барып жерді көктемде де аралап жүріп көрді. Қай жерде екенін хабар беріп отырды ғой бұлар. Көрсетіп, малшылар өздері айтып отырады шетінен қай жерде шегіртке көп соны. Соның арқасында тоқтатты қазір шегірткені.
Жауаптылар енді азиялық үйірлі шегірткеге қарсы күресті бастамақ. Дәрілеу шілде айының ортасына дейін жалғасады. Бұл жұмыстарға республикалық бюджеттен 460 млн теңге бөлінген.
Мерей Бает, Тимур Сейілхан, Елдар Байділдә
