Ақмола облысының әкімдігі және QazaqGaz ұлттық компаниясының бірлескен жұмысының арқасында Ақмола облысы Целиноград ауданына қарасты Шұбар ауылына көгілдір отын берілді.
Ауылдағы 400 үйге газ жеткізу үшін 75 шақырым газ құбыры тартылды.
Мемлекет басшысының ауылдарды газдандыру жөніндегі тапсырмасы сәтті жүзеге асып жатыр. Соның бір дәлелі Шұбар ауылындағы қуаныш. Бұған дейін "QazaqGaz" ұлттық компаниясы облыстың инвестициялық жобасы аясында Нұрлы ауылындағы 1100 үйдің көгілдір отынға қосылуына жағдай жасаған еді.
Марат Ахметжанов, Ақмола облысының әкімі:
- Үйлерді қамтуға ғана емес, өндірістерді ашуға, жұмыс орнын жасап, инвесторларды шақыртып, ауылдарға жаңа екпін беретін жағдай болады осы газдың арқасында.
Көгілдір отын ең алдымен Әйгерім Бейсенбаеваның үйіне қосылды. Көпбалалы ананың қуанышында шек жоқ.
Әйгерім Бейсенбаева, Шұбар ауылының тұрғыны:
-6 жыл көлемінде болады осы жақта тұрып жатқанымызға, көмір алатын едік. Қысы-жазы оны шығаруың бар, жағуың бар. Енді қазір уақытқа да үнем. Баланы да көп қарауға уақыт болады.
Жалпы Ақмола облысында газдандыру жұмыстарына қатысты 12 жоба жүзеге асырылып жатыр.
Санжар Жаркешов, "QAZAQGAZ" ҰК" АҚ Басқарма төрағасы:
- Алдымызда шамамен 6 елді мекен осы Ақмола облысында қосылатын болады. Қосшы қаласынан қосылады. Бұл 33 мың абонент. Жалпы саны 140 мың тұрғын газға қол жеткізетін болады.
Өңірдегі газбен қамту жұмыстары 2027 жылы аяқталады. Көгілдір отынның игілігін әрбір тұрғын көруі тиіс. Осы орайда әлеуметтік осал топтар үшін жергілікті биліктен 100 АЕК мөлшерінде көмекақы ұсынылады.
Мерей Мұратханқызы, Руслан Әлиев
