Алты боксшымыз жартылай финалда. Таиланд астанасы Бангкок қаласында былғары қолғап шеберлері арасында халықаралық турнир жалғасып жатыр. Жарыстың кезекті күні төрт боксшымыз жұдырықтасып, төртеуі де жартылай финалға жолдама алды.
Көпшілік әсіресе 65 келіде қазақстандық Дулат Бекбауов пен қырғызстандық Мұнарбек Сейітбекұлы кездесуін тағатсыздана күткен еді. Өйткені Дулат әлем чемпионатының, ал Мұнарбек Олимпиада ойындарының күміс жүлдегері. Жекпе-жек қазақ боксшысының айқын басымдығымен өтті. Сәйкесінше Дулат жарысты жалғастыруға мүмкіндік алды. Бұдан бөлек, 55 келідегі Нұрсұлтан Алтынбек те жапон боксшысынан басым түсіп, жартылай финалға шықты. Дәл осылай 50 келідегі Нұрзат Оңғар кореялық, ал 80 келідегі Диас Молжігітов индонезиялық спортшыларды жеңді.
Айта кетейік, бұған дейін 70 келідегі Төрехан Сабырхан мен 90 келідегі Данияр Рахымбердиев те жартылай финалға өткен еді. Енді бүгін ширек финалда қос боксшымыз жұдырықтасады. 75 келідегі Тимур Нұрсейітов пен 85 келідегі Бекзат Таңатар бақтарын сынайды.
Жалпы сандармен айтар болсақ, жарысқа келген 10 боксшымыздың екеуі жеңілді, екеуі ширек финалда. Қалған алтауы жартылай финалға шығып отыр. Бангкок қаласындағы бокс бәсекесі 1 маусымға дейін жалғасады.
Сағадат Нұрмағамбетовты еске алу турнирі
10 елдің боксшылары Алматыға жиналды. Ол жақта халық қаһарманы Сағадат Нұрмағамбетовты еске алуға арналған халықаралық турнир басталды. Негізі бұл талай таланттың жолын ашқан жарыс. Атап айтсақ, ел мерейін асқақтатқан Данияр Елеусінов пен Біржан Жақыпов, Василий Жиров пен Генадий Головкин және Серік Сәпиев секілді мықтылар осы Нұрмағамбетов турнирінде шыңдалған. Биыл да алыс-жақын шет мемлекеттерден 150-ден аса үміткер бақ сынайды. Иран, Өзбекстан, Ресей, Моңғолия, Армения, Тәжікстан, Әзербайжан, Түрікменстан, Қырғызстан және Бірккен Араб Әмірліктерінен мықтылар келіпті. Еліміздің түкпір-түкпірінен жиналған боксшылардың да осалы жоқ. Олар енді 13 салмақ дәрежесінде өзара мықтыны анықтайды. Жарыс қорытындысы бойынша үздік боксшыларға спорт шебері атағы беріледі. Бұл биылғы жарыстың негізгі еркшелігі деуге болады. Бокс бәсекесінің өзі 30 мамырға дейін жалғасады.
Қазақ қыздары әлемдік рейтингте көш бастады
Ташкент төрінде тарихи нәтиже тіркеген каратэшілеріміз Раббат қаласында да бұрын-соңды болмаған жетістікпен қуантуы мүмкін. Бірер күннен кейін Марокко астанасында әлемдік Премьер-лиганың шешуші кезеңі өтеді және оның қорытындысы ойынша жылдың үздік спортшылары марпатталады. Былтыр бұл құрметке қазақстандық Мөлдір Жаңбырбай ғана ие болған еді. Енді биыл үш бірдей үміткеріміз бар. Яғни 50 келідегі Мөлдір Жаңбырбай Grand Winner сыйлығының екі дүркін иегері атана алады. Бұған қоса 61 келідегі Әсел Қанай мен 68+ келідегі Софья Берульцева да қазір әлемдік рейтингте жоғары тұр. Сәйкесінше олар да өз салмақ дәрежелерінде Grand Winner сыйлығына негізгі үміткер саналады. Премьер-лиганы 4 шешуші бәсекесі алдағы жұма күні, яғни 30 мамырда басталады және 3 күнге созылады. Аталмыш жарыс қорытындысы бойынша сол жерде марапаттау рәсімі ұйымдастырылады.
