Ақмола облысында ауыл шаруашылығы саласында еңбек ететін нәзік жандылар қатары артып келеді .
Олар ерлермен қатар иық тірестіре қызмет атқарады. Әсіресе агроном, инженер сынды мамандықтарды игеріп, аграрлы аймақтың дамуына өз үлесін қосуда. Тіпті техниканың тілін меңгерген арулар бар.
Егіс алқабындағы тыныс-тіршілік бөлек. Қарбалас пен күйбең тірлік көп. Бұған тәжірибелі агроном Светлана Орехованың еті әбден үйреніп кеткен. Өйткені ол осы салада 46 жылға жуық еңбек етеді. Зейнетке шықсада әлі де сүйікті ісімен айналысып жүр. Ауыл шаруашылығы техникумын бітіргеннен кейін ол аз уақыт тұқым өсіру шаруашылығында жұмыс істейді. Сол кезден ақ агроном болуды армандайы. Бірақ ол арманы бірден орындала қоймайды.
Светлана Орехова, агроном:
- Ол кезде ер басшылар әйел адамдарды агроном қылып жұмысқа алғысы келмейтін. Мен сол кезде басқа салаларға барып қызмет етіп көрдім. Бірақ сонда да алқапты аңсап тұратынмын. Кейін осы шаруашылыққа келдім. Біз мұнда бәрін басынан бастадық. Ештеңе болған жоқ. Тіпті егіс алқаптарының өзі құрғап, қалың шөпке оранып жататын. Бәрін тазалап, осындай ірі серіктестік құрдық.
Қазір кейіпкеріміз Жарқайың ауданындағы ең ірі серіктестіктің бірінде қызмет етеді. Дәл осы жерде ол тұқым шаруашылығын қолға алған. Яғни жаңа технологияларды пайдаланып майлы дақылдардың жаңа сұрпын шығарады. Ол аймақтың климаттық жағдайына толығымен сәйкес келеді. Ал жаңа сұрыптың артықшылығы мен кемшілігін арнайы алқаптарда сынап көреді. Қазір агроном осы көп жылдық тәжірибесімен жастарға үнемі бөлісіп отырады.
Светлана Орехова, агроном:
- Қазір мен ақша үшін емес өзімнің жан қалауым үшін жұмыс істеймін. Өйткені маған өз жұмысым ұнайды. Мен мұнда жастарға білгенімді айтып, үйретуге тырысам. Адам өз сүйген ісімен ғана айналысу керек деп есептеймін. Сонда ғана жұмысын жемісін береді.
Көктемгі және күзгі егіс науқаны кезінде агрономның жұмысы қауырт. Уақытпен санаспайды. Күн-түн демей бел жазбайды. Светлана Орехованың осы еңбекқорлығын әріптестері де жоғары бағалайды.
Надежда Мосейчук, Светлана Орехованың әріптесі:
- Светлана Юрьевнамен жиырма үш жылға жуық жұмыс істеймін. Ол өз ісінің нағыз маманы. Жұмысына асқан жауапкершілікпен қарайды. Үнемі жастарға үлгі етіп отырамыз.
Кейіпкеріміз осымен тоқтап қалмақ емес. Керісінше алдағы уақытта осы ісін жандандыруды көздейді. Яғни біліктілігін арттырып, құрғақшылыққа төзімді тұқымның жаңа сұрып ойлап тапқысы келеді. Осылайша мол өнім алуға ниетті.
Абзал Азаматұлы, Евгений Шинкаренко
