Жезқазғанда заңсыз қоқыс алаңдары азаймай тұр.
Былтыр ғарыштан жүргізілген бақылау нәтижесінде 130 дан астам қоқыс алаңы пайда болғаны анықталды. Оның басым бөлігі әуежайға барар жолдың қос қапталында және жаңадан бой көтеріп жатқан Батыс ауданда шоғырланған. Бүгінге дейін соның 8-і ғана жойылған. Экология департаменті жауапты мамандарға жұмысты ширату жөнінде кезекті рет ескерту жасады. Алайда әкімдік өкілдері бейберекет шашылған қоқысты биыл толық жинап үлгірмейміз дейді.
Шабдан Тынымбаев, Экология департаменті басшысы орынбасарының міндетін атқарушы:
- Жол картасы жасалған болатын. Ол 2024 жылы жасалған. Онда тиісті уақыттары көрсетілген, жаңағы заңсыз қоқыстарды жою туралы. Бірақ, өкінішке орай, 2024 жылы бұл тапсырма орындалмады. Заңсыз тасталған қоқыстардың уақытылы алынбауына байланысты лауазымды тұлғаларға, ЖКХ бөлімінің басшыларына тиісті айыппұл салынып, өндіріп алынды.
Әділ Темоханов, қалалық ТҮКШ бөлімінің маманы:
- Ағымдағы жылы қаламыздағы рұқсат етілмеген қоқыс алаңдарын тазалауға 27 млн теңге ақша бөлінді. Жылдың аяғына дейін 50-ге жуық қоқыс алаңын тазартамыз деген ойдамыз. Биыл бітпейді. Қалғанын келесі жылы қарастыратын боламыз.
