Астана көшелерін жасанды интелектіге негізделген техника тазартады. Жалпы тазалық саласында да жаңа технологиялар енгізіліп жатыр. Бұл қызметкерлердің жұмысын жеңілдеткенімен, жауапкершілігін арттырады. Сондай-ақ 50 жаңа тазалық машиналары қолданысқа берілді. Толығырақ тілші материалында.
Ақниет Балтанова, тілші:
Мына жанымдағы техниканың барлығы биыл жаңадан алынған. Астанада шамамен жылына 132 мың тонна шаң таралады екен. «Шаңсорғыш» деп аталатын осы көлік бір жағы жұмысшылардың шаруасын жеңілдетсе, екінші жағы барлық шаңды сорып алады. Осы типтес 50-ге жуық техника биыл қолданысқа беріліп отыр.
Тазалық машиналарының қатарын әлі де арттыру жоспары бар. Себебі сору турбинасымен жабдықталған «шаңсорғыш» экологиялық жағынан өте тиімді. Қаланың күре жолдарынан бастап, жаяу жүргіншілер жолын да тазартады. Әрбір техникаға жасанды интелектіге жалғанған бейнебақылаулар орнатылып жатыр. Жүргізуші қалғып кетсе, телефонмен сөйлессе, жүрмей, бір орында тұрып қалса, камера бірден дабыл қағып, жағдайды тіркейді.
Дастан Мұсабеков, көлікті бақылау бөілімінің басшысы:
Қазір пилоттық жоба ретінде бейнебақылауды 1 көлікке орнаттық. Маусым басталғанша біздегі барлық техникаға жасанды интеллект енгіземіз. Тәртіп бұзғандарға ескерту жасалады, қайталанса, қайта тестілеуден өтіп, біліктілігін арттырады.
Кәсіптік білімді игеріп жатқан колледж студенттерінің өндірістік іс-тәжірибеден ақылы түрде өтуіне мүмкіндігі бар. «Астана Тазалық» мекемесі мен Техникалық колледж арасында меморандум жасалды.
Замир Сағынов, «Астана – Тазалық» ЖШС бас директоры:
Колледждерде біздің мамандықпен кісілерді дайындайды. Базасы өте жақсы. Өздерінде 40 мың үстінде стипендиясы бар екен. Біз 150 мың қолға беріп тұратын болсақ, алыс дейтін болса, жатақхана беруге болады.
«Жұмысшы мамандықтар жылы» аясында еңбек адамдарына қолайлы жағдай жасалып жатқаны рас. Бірақ талап та күшейді. Мәселен мына құрылғы жұмысшыларды 2 мезгіл тексереді. Мұнда алкотест орнатылған, сондай-ақ қан қысымы мен температураны анықтайды. Осылайша ұйымдағы медицина қызметкерлері мен диспетчерлерді азайтып, өзге жұмысшы мамандардың жалақысын кезең-кезеңімен арттыру көзделген.
Ақниет Балтанова
