Қызылордадағы қылмыстық-атқару жүйесі мекемесінде тігін шеберханалары ашылып, жазасын өтеушілер осы кәсіп түрін меңгеріп жатыр, деп хабарлайды 24KZ. Қазір жеңіл өнеркәсіп өндірісінде 50-ден астам сотталған жұмыс істейді. Олар қандай өнім түрлерін шығарады?
Қылмыстық-атқару жүйесі департаментінің №60 мекемесінде екі тігін цехы бар. Мұнда 50 адам жұмыс істейді. Әрқайсысы күніне екі арнайы киім тігеді. Сонымен қатар төсек жабдықтары мен қызметтік формалар да дайындалады. 42 жастағы Байқоңыр қаласының тұрғыны тігін машинасының қыр-сырын бір ай шамасында меңгеріп алғанын айтады.
Жазасын өтеуші:
- Үйреніп алғаныма да өкінбеймін. Келешекте де керек деп осындай шешім қабылдап, осы тігінді үйреніп алдым. Қазіргі біздің отырған машиналар, соңғы машиналар, алдыңғыға қарағанда жақсы. Тігуге де оңай.
Қазір тігін өнімдеріне сұраныс жоғары. Сондықтан болар, биыл мекеме аумағынан екінші тігін шеберханасы ашылған. Мұнда 25 сотталған жұмыспен қамтылып отыр. «Тапсырыс уақытылы орындалады. Өнім сапасы жоғары. Бұл бастама сотталғандарды еңбекпен қамтып қоймай, олардың болашақ кәсібін бастауына да жол ашады. Қылмыстық-атқару жүйесі мекемелерінің өндірістік әлеуетін арттыруға мүмкіндік береді», – дейді мамандар.
Шәймерден Есенгелдиев, Қылмыстық-атқару жүйесі департаментінің басшысы:
- Былтырдан қарағанда 20% сотталғандарымыз жұмыспен қамтылды. Сотталған азаматтарымыз өздерінің жалақыларын өздеріне керек заттарына, өздерінің туған-туысқандарына және өздерінің мемлекеттік атқару парақтары бар қарыздарын өтеуге және жәбірленушілердің қарыздарын өтеуге өздері жұмсайды.
Қазір бұл мекемеде 900-ден астам адам жазасын өтеп жатыр. Оның жартысына жуығы жұмыспен қамтылған. Мамандардың айтуынша, 14 өндірістік цех мекеме аумағында жұмыс істеп тұр. Жыл соңына дейін тағы бірнешеуі іске қосылмақ.
Авторлары: Нұрлан Жақыпбеков, Нұржан Мұзарапшин, Айтмұхамбет Байділдаев
