Ақтөбелік жазушы Мәди Райымов ерекше бала туралы ертегі жазуға кірісті, деп хабарлайды 24KZ. Қаламгердің туындысы денсаулығының ақауы бар бүлдіршіндер мен олардың ата-анасына психологиялық қолдау болмақ . Республикалық әкелер одағының белсенді мүшесі Мәди Райымов: «Ер азаматтың отбасы институтын нығайтудағы рөлі өте маңызды», – дейді.
«Аэлин, нұры бар қыз» ертегісі эпилепсияға шалдыққан бүлдіршін туралы. Шығарма желісі кейіпкердің сырқатын қабылдап, қоғамға бейімделуіне септігін тигізеді. Жазушы дауасы жоқ дертті таңғажайып сиқырға балап, онымен күресетін дәрі-дәрмекті ғажайып кристалдар ретінде бейнелейді. Мұндай метафора ерекше балақайларға балалық түйсігімен өзінің жай-күйін түсінуге мүмкіндік береді. Сонымен қатар ата-аналарға да бағыт-бағдар болады.
Мәди Райымов, жазушы:
- Бұл кітапты мен балалар үшін ғана емес, ата-аналарға арнап жазып жатырмын. Олар балаларының өзге балалардан еш айырмашылығы жоқ екенін түсінуі керек. Мүгедектігі бар балаларды бөліп-жарып, шектеудің қажеті жоқ. Олар кез келген мектепте және балабақшада өзге балалармен қатар оқуы тиіс.
Мәди Райымов: «Бүгінгі ата-аналардың дені балаға ойыншық әперумен шектеледі», – дейді. Әсіресе жұмысбасты ер азаматтар өскелең ұрпақтың тәрбиесіне селқос қарап, үлес қоса бермейді. Жазушы бала үшін әкенің ықыласынан қымбат сый жоқ деп санайды. Сол себепті де перзенттеріне күнделікті көңіл бөлуді әдетке айналдырған.
Әйгерім Райымова, М. Райымовтың әйелі:
Баланы ана мен әке бірге тәрбиелеуі тиіс деп ойлаймын. Себебі әкенің орны өте маңызды. Менің өзім балаларды жалғыз жетектеп, тәлім-тәрбие бере алмасым айдан анық. Балаларымыз да әкесіне қатты бауыр басқан.
Жазушы республикалық «Әкелер одағының» белді мүшесі. Бірлестік ер азаматтардың түйткілді мәселелерін көтереді. Отбасындағы әкенің рөлі, жалғызілікті әкелерді қолдау, технологиялық заманда өскелең ұрпақты рухани құндылықтармен тәрбиелеудің маңыздылығын әрдайым сөз етеді. Мәди Райымов: «Соңғы уақытта балаларды баулуда әкелердің белсенділігі қуантады», – дейді.
Мәди Райымов, жазушы:
- Қазір кез келген аулаға барып қараңыз. Балаларын ойнатып жүрген ер адамды жиі көресіз. Қоғамда айтарлықтай өзгеріс бар деуге болады. Өйткені соңғы 30 жылда біз отбасын бірінші орынға қоятын жастарды, ер азаматты өсірдік. Менің ойымша, мұны одан әрі дамыту қажет.
Ол үшін әр өңірде отбасы орталығы болғанын абзал санайды. Мәселен, коворкинг алаңында жастарға психологиялық қолдау көрсетілуі тиіс. Ал республикалық «Әкелер одағы» бірлестігі өкілдері мол тәжірибесін бөлісуге әзір. Себебі бақытты бала тату отбасында және бақытты ата-ананың қамқорлығымен өседі.
Авторлары: Мансұр Есқожин, Айнадин Молдабеков
