Алматы қаласында бірнеше жыл бойы әлеуметтік желілер арқылы жаңа туған сәбилерді заңсыз сатумен айналысқан қылмыстық топтың әрекеті әшкереленді, деп хабарлайды Egemen .kz.
Тергеу барысында белгілі болғандай, қылмыстық топтың мүшелері әлеуметтік желі арқылы бала асырап алғысы келетін адамдар мен әлеуметтік осал топтардан шыққан әйелдерді байланыстырып отырған. Олардың арасында шетелдік азаматшалар да болған.
Оперативтік іс-шара кезінде полицейлер жаңа туған ұл баланы ірі ақша сомасына сату әрекетін тіркеп, күдіктілерді қылмыс үстінде ұстады. Қазіргі таңда аталған факт бойынша қылмыстық іс қозғалып, күдіктілер қамауға алынды. Сәби мемлекет қамқорлығына алынып, арнайы мекемеге орналастырылды.
Алматы қалалық полиция департаменті бастығының бірінші орынбасары Қуатбек Науатов:
-Бұл бір реттік оқиға емес. Біз орныққан, жүйелі схема болған деп санаймыз. Мүмкін, бұл қылмыс басқа өңірлермен де байланысты. Жаңа туған сәбилерге қатысты мұндай заңсыз әрекеттер – адамгершілікке жат ауыр қылмыс. Мұндай істердің ешқайсысы жазасыз қалмайды,- деді.
Арайлым МЫРЗАХАН, ЕҰУ студенті
