KazTAG ақпарат агенттігінің бас директоры Әсет Матаев пен бас редакторы Әмір Қасенов Freedom Finance компаниясына қатысты жарияланған материалдардан кейін қылмыстық іске тартылды.
Бұл ақпаратты агенттіктің өзі хабарлады.
Редакцияның мәлімдеуінше, қылмыстық іс 18 тамызда қозғалғанымен, олар бұл жөнінде тек 20 қарашада басқа БАҚ арқылы білген. KazTAG өкілдерінің айтуынша, осы уақыт ішінде құқық қорғау органдары редакцияны хабардар етпестен тергеу және сараптама жүргізген.
Агенттік адвокаты Рена Керимова процессуалдық нормалардың бұзылғанын атап өтті. Оның айтуынша, Матаев пен Қасеновтің тергеуден қашқаны дәлелденбей жатып, оларды қатыстырмай күдікті деп тану заң талаптарына қайшы.
KazTAG мәліметінше, Freedom Finance тарапынан шағым түскен материалдардың ақпарат көзі – адвокат Светлана Оралбаева және жәбірленушілер Гүлмира Исаева, Жанна Қапарова мен Карина Гайфулина болған. Олардың барлығы редакцияға өз бастамасымен жүгінген. Агенттік Freedom Finance компаниясына ресми сауал жолдағанымен, жауап ала алмағанын айтады.
Редакция бұл жағдайды БАҚ-қа қысым көрсету әрекеті деп бағалап отыр. «Бұл – қорқыту әрекеті», – деп мәлімдеді KazTAG.
Сонымен қатар агенттік Freedom Finance-тің бұрынғы директоры Руслан Какенов пен журналист арасындағы әңгіме стенограммасын жариялады. Редакцияның айтуынша, ол санкцияларды айналып өтуге қатысты схемалар туралы айтқан. KazTAG аудиожазбаны және сұрау хаттарды АҚШ пен ЕО елшіліктеріне, сондай-ақ Қаржы нарығын реттеу агенттігіне, Ұлттық банкке және Ұлттық экономика министрлігіне жолдады.
