Жоғарғы оқу орнын мемлекеттік грантпен үздік аяқтаған студенттер аудандық, ауылдық деңгейдегі мемлекеттік қызметке конкурстық іріктеусіз қабылданады, деп хабарлайды 24KZ. Бұндай мүмкіндік жастарға мемлекеттік қызмет туралы заңның 15 бабындағы өзгерістерге сәйкес туып отыр. Түркістан облысында бұл бастама қалай жүзеге асып жатыр? Жастардың мемлекеттік қызметке деген қызығушылығы қалай?
Кентау қаласының тұрғыны Ақниет Әбсемет М. Әуезов атындағы Оңтүстік Қазақстан университетінің түлегі. Жас маман аталған оқу орнын ауыл шаруашылығы мамандығы бойынша үздік бітірген. Мемлекеттік қызмет туралы заңдағы өзгерістерге сәйкес өткен жылы Хантағы ауылдық округі әкімдігіне бас маман болып жұмысқа орналасқан.
Ақниет Әбсемет, Хантағы ауылдық округі әкімдігінің бас маманы:
- Мемлекеттік қызметке мен конкурссыз және тестілеусіз орналастым. Қазіргі таңда статистика маманы болып жұмыс істеймін және мал санағы бойынша малдың есебіне жауаптымын.
Ал Жанна Айдарқызы жоғарғы оқу орнын ақпараттық жүйелер мамандығы бойынша бітірген. Мемлекеттік грантпен оқыған үздік студент былтырдан бері Сайрам ауданы Шаға ауылдық округі әкімдігінде бас маман болып қызмет атқарады. Жас маман жұмысы өзіне ұнайтынын айтады.
Жанна Айдарқызы, Шаға ауылдық округі әкімдігінің бас маманы:
- Мемлекеттік қызметке деген қызығушылығым артып, осы шалғай ауылдардағы кадр тапшылғын жою мақсатында осы жерге жұмысқа келдім. Ішкі саясат бөліміне қараймыз. Ауылдағы мешіттің жұмысымен, құқықбұзушылықтармен айналысамыз. Ал қазір іште жасап жатқан жұмысым – хат алмасу. Солардың бәріне жауаптымын.
Мамандар бұл білікті жастарды мемлекеттік қызметке ынталандырып, олардың ауылдық жерге барып, мемлекеттік қызметке кіруін жеңілдететінін айтады. Бүгінгі күні еліміз бойынша 500-ге жуық жас осы мүмкіндікті пайдаланған. Оның ішінде 44-і Түркістан облысындағы ауылдық жерлерде жемісті еңбек етіп жатыр.
Абылайхан Наурызбаев, Мемлекеттік қызмет істері агенттігі Түркістан облысы бойынша департаментінің басшысы:
- Бұл бастама ауылдық, аудандық деңгейдегі мемлекеттік қызметтегі кадр тапшылығын жоюға, дарынды жастарды қолдауға, өңірге оралуына септігін тигізіп отыр. Мемлекеттік қызметтегі білікті жастардың жаңа легін қалыптастыру – Мемлекеттік қызмет істері агенттігінің іске асырып жатқан бастамасы.
Бұл өзгеріс – «елге қызмет етемін» деген мемлекетшіл жастар үшін таптырмас мүмкіндік. Сондықтан мамандар жоғарғы оқу орнын бітірген түлектер мемлекеттік қызметтегі оң өзгерістерді тиімді пайдалануы керектігін айтады.
Авторлары: Жандос Жұмабек, Ерболат Әбіш
